(Infobae) – Cuatro trahado Brasileño y un Uruguayo a ser haya na Brazil hibando un bida di sclavitud, na unda nan tabata biba den un cas cu condicionnan precario di limpiesa y sanidad.
Mayoria di nan tabata di Santana do Livramento, ciudad limite cu Uruguay, y otro tabata di Rivera. E victimanan tabata traha 16 ora pa dia.
E trahadonan a keda descubri despues di un accion fiscal realisa pa Ministerio di Trabao y Empleo di Rio Grande del Sur y Polis Federal di Brazil. “E victimanan tabata den condicionnan similar na sclavitud na municipio Farruopilha”,” segun autoridadnan a informa.
Dos di e trahadonan ta hobennan di 15 y 17 aña y no tabata compaña pa nan representante legal.
E trahadonan a yega na Farruopilha bao gañamento. A contrata nan pa traha den cosecha di appel mediante promesanan falso riba nan salario, alimentacion y vivienda. Ora nan a yega na e campo den cual mester a bay traha, nan a ser aloha “den condicionnan deplorabel” di salud, seguridad y higiena.
E vivienda ta ubica den fondo di un freezer, cu tabata cera cu un porta di metal cu cual e propietarionan tabata busca evita cu autoridadnan por a haya sa di e explotacion laboral. Ademas, e personanan sclavisa mester a atravesa un sala di mashinnan.
Unidad di fiscalisacion di Ministerio di Trabao ta esun cu a constata cu tabatin cinco trahado den condicionnan aki. E explotadonan tabata sa caba cu ta bay ricibi un inspeccion y a adverti e esclavonan: nan a ordena nan cu si tabata yega un unidad, nan a mester a huy of sconde.
E trahadonan tabata biba den un luga cu hopi zonido debi na mashinnan, cu condicionnan di limpiesa y sanitario “precario” y cu un riool habri na banda, nan no tabata ricibi ni sikiera papel di baño y e camanan tabatin corchon bieu. Despues di e inspeccion, a cera e luga.
Como medida di prevencion, ministerio a manda e cinco trahado na otro luga di alohamento y ta calcula cuanto ta e costo di indemnisacion, ademas nan a ser manda na seguro pa desempleo y ta bay paga nan transporte pa nan luga di origen.
