Presidente di Brazil, Jair Bolsonaro a bisa ayera cu e kier papia tocante e candela na Amazon cu a hala atencion mundial durante e proximo Asamblea General di ONU e luna aki, mientras e asunto ta parce di afecta su sosten na cas.
Bolsonaro a bisa reporteronan na Brasilia cu e kier papia ‘cu patriotismo’ tocante Amazon, un region cu e ta bisa administracionnan anterior a ignora. “Mi no lo acepta limosna di niun pais di mundo bou pretexto di preserva Amazon ora esaki ta dividi den tereno y bendi”, e Presidente derechista a bisa.
Secretario General di ONU, Antonio Guterres a sugeri siman pasa pa tene un reunion pa trata e candelanan cu a consumi parti di selva Brasileño.
Amazon Brasileño a mira 30.091 candela den augustus, e cantidad mas halto pa e luna desde 2010, segun e Instituto Nacional di Investigacion Espacial di Brazil. E cifra a lanta critica internacional tocante e maneho di e gobierno pa cu asuntonan di medio ambiente y su agenda pro-negoshi, y ta parce di ta afectando popularidad di Bolsonaro na cas.
Instituto di encuesta, Datafolha a reporta ayera cu 38 porciento di Brasileño ta desaproba e accionnan di gobierno – e pio desde cu a yega na poder dia 1 di januari – y cu apenas 29% di e poblacion ta duna sosten. Datafolha a entrevista 2,878 persona entre dia 29-30 di augustus ultimo y cu un margen di eror di 2 punto porcentual.
Ministernan di Medio Ambiente, Agricultura y Defensa a participa den un trip ayera na Belem, den e estado Amazonico di Para, pa discuti e candela cu ta continua den e area.
Den un declaracion, grupo di derechonan humano Amnesty International a bisa cu autoridadnan mester investiga y enhuicia e responsabelnan pa e candela ilegal, ‘de lo contrario inevitablemente nos lo mira nan bira pio a traves di e resto di e tempo di Presidente Bolsonaro den su cargo’.
