E ex-candidato presidencial y ex-Prome Dama di Guatemala, Sandra Torres a ser aresta ayera pa via di tin vinculo cu un caso di corupcion den su partido na 2015, Fiscalia a informa.
A detene Torres, di 63 aña, na su residencia den un exclusivo sector cerca di oost di Ciudad di Guatemala, segun Julia Barrera, Vocero di Ministerio Publico a declara. E acusado lo bay na e Torre di Tribunal, na e centro civico di e capital.
E lider di Unidad Nacional di Speransa (UNE) tabata e prome dama entre 2008 y 2011, durante e presidencia di Álvaro Colom. El a busca reemplasa su casa, pero e no por pa motibo cu e prohibicion di reeleccion consecutivo ta inclui e famia di e mandatario. Despues el a divorcia, pero esey tampoco a sirbi y no a convence e autoridadnan electoral.
Na su intento ultimo pa yega e presidencia, dia 11 di augustus pasa el a perde den e di dos buelta electoral contra Alejandro Giammattei di partido Vamos, pa 58 contra 42% di e votonan.
Husticia ta acusa Torres pa financiamento electoral ilicito na 2015: Falta di constancia di origen di e cantidad ekivalente pa 3.6 miyon dollar, pa lo cual Ministerio Publico a anuncia cu lo pidi e cancelacion di e partido UNE despues di e di dos buelta electoral.
E comision y MP a pidi pa retira e inmunidad pa Torres como candidata pa husg’e, pero e Corte Supremo di Husticia e nenga. Despues e Corte di Constitucionalidad, e instancia legal mas halto di e pais, a laga e caso cera cu un resolucion provisional.
