(Infobae) – Tribunal di Husticia di segundo instancia di Sao Paulo diahuebs ultimo a condena ex-presidente Jair Bolsonaro pa paga un indemnisacion di 50.000 real Brasileño (casi 10.000 dollar) pa daño moral na periodistanan.
E Camara Cuatro di Derecho Priva di e tribunal a confirma e sentencia dicta na juni 2022 y a modifica solamente e balor di e indemnisacion cu e lider ultraderechista tin cu paga.
Primeramente e indemnisacion cu hues a impone tabata di 100.000 real (casi 200.000 dollar); despues e mesun tribunal a reduci’e te 50.000 real.
Magistradonan di tribunal di segundo instancia a cumpli e argumentonan di Sindicato di Periodistanan Profesional di Estado di Sao Paulo den sentido cu na e tempo ey, e hefe di Estado a comete e delito di acoso moral pa su atakenan constante contra prensa y cu mester indemnisa pa daño moral colectivo.
Ekipo legal di Bolsonaro, cu mester haci e pago aki na Fondo Estatal di Defensa di Derechonan Difusor, cual tin e obheto di promove e reparacion di daño causa na medio ambiente of derechonan di caracter artistico of colectivo, a argumenta cu “nunca tabatin censura” y cu su palabranan no tabata referi na tur oficio “sino na profesionalnan determina.”
Husticia a considera cu Bolsonaro na e momento ey como presidente a abusa di su derecho di libertad di expresion pa ofende prensa.
Segun e sindicato cu a presenta e denuncia, Bolsonaro “a atenta contra e propio libertad di prensa y contra democracia debi cu di forma desfaborabel, sin respet y humiliante, cu uso di violencia verbal, palabranan malo, expresionnan ofensivo, homofobico, xenofobico y machista a supone derecho na libertad di expresion y a acosa moralmente e colectivo.”
Segun datonan di Asociacion Brasileño di Periodismo di Investigacion, Bolsonaro ta autor di 557 agresion contra medionan di comunicacion y su profesionalnan na 2022, e cual a intensifica durante campaña pa eleccion presidencial di october, den cual e iskierdista Luis Inacion Lula da Silva a gana.
