(AP) — Decenas di miles di Brasileño bistiendo colornan di bandera nacional a reuni ayera na e pais pa protesta contra e derota di presidente Jair Bolsonaro den eleccion luna pasa, exigiendo pa forsanan arma interveni.
Na Rio de Janeiro, Brasileñonan a aglomera pafo di un facilidad militar regional pa denuncia loke nan ta mira como un eleccion inhusto of horta, desafiando un orden reciente di Corte Supremo pa libera caminda y espacionan publico. Ningun di e institucionnan certifica pa audita e eleccion, incluyendo ministerio di Defensa y Asociacion di Abogado di Brazil a haya evidencia di fraude.
Dos siman a pasa desde cu ex-presidente iskierdista, Luiz Inacio Lula da Silva a derota Bolsonaro den un di e eleccionnan presidencial mas preta, cu apenas 50.9 porciento di voto. Maske administracion di Bolsonaro no a opone e transicion di poder, e lider derechista ainda no a concede ni felicita su oponente.
Cantidad di su sostenedornan ta siguiendo su pasonan y ta nenga di acepta e resultado. Na dado momento, nan a menasa di paralisa e pais cu mas di mil caminda y autopista blokea. Dia 11 di november, Corte Supremo a duna orden na polis pa libera tur caminda y espacio publico.
Manifestantenan tambe a denuncia e ceramento di hopi cuenta y gruponan pro-Bolsonaro riba plataformanan di rednan social, na man di loke nan ta bisa ta un autoridad electoral parcial. Nan a describi e decisionnan en cuestion como censura.
Den un conferencia e siman aki na Ciudad di New York, Corte Supremo di Husticia y presidente di autoridad electoral Alexandre de Moraes a bisa cu “democracia a wordo ataca pero a sobrevivi”.
Bolsonaro ripitidamente a cuestiona e confiabilidad di e sistema electronico di votacion di e pais. Na cierto punto el a bisa di tin prueba di fraude, pero ora corte electoral a yam’e dilanti, e no a presenta esaki. Desde cu el a perde eleccion, e lider derechista ta silencioso y ausente riba rednan social.
Protestanan a tuma lugar tambe na e ciudad capital di Brasilia, Sao Paulo, Belo Horizonte y ciudadnan chikito tambe. Na Brasilia, mester a escolta un team di periodista for di e multitud, segun corant Folha de S. Paulo a reporta. Cuerpo policial tabata blokea acceso na e square amplio cerca di ministerionan y Congreso, unda protestanan ta tuma lugar usualmente.
Hopi di e manifestantenan tabata spera di haya un rapport di Ministerio di Defensa, cual Bolsonaro a busca pa involucra den supervision di e eleccion, lo substancia nan acusacionnan. Sinembargo, e documento publica siman pasa a propone mehoracionnan pa adresa algun fayo den sistema electoral di Brazil, pero no a inclui ningun evidencia di fraude.
Oficina di Procurador General a revisa e rapport y no a haya “ningun hecho concreto” cu lo hustifica habri un investigacion riba mashin di votacion electronico, segun Folha di S. Paulo.
