(infobae) – Tapaboca ta bira obligatorio un biaha mas den aeropuerto y vuelonan na Brazil for di proximo diabierna debi na un brote nobo di contagio di Covid-19, segun un orden nobo imponi pa autoridadnan sanitario.
Uso di tapaboca a stop di ta obligatorio augustus ultimo, pero a bolbe keda imponi debi na e “datonan epidemiologico actual, cu ta indica un aumento den cantidad di caso di Covid-19 den poblacion Brazileño” segun un comunicado di Agencia Nacional di Vigilancia Sanitario (Anvisa) publica den anochi di diamars.
Brazil ta un di e paisnan cu mas a sufri pa e pandemia na mundo, ta acumula awo casi 690mil morto y mas di 35 miyon di contagio, y den ultimo simannan a registra un fuerte aumento den infeccion.
Segun Conseho Nacional di Secretarionan di Salud (Conass), den prome binti dia di november e cantidad di contagio a supera 95mil, cu un aumento di 292 porciento den relacion cu e luna anterior.
Sinembargo e cantidad di fayecido no a aumenta den mesun proporcion sino cu a mantene den un promedio di 45 pa dia den ultimo dos siman.
Institucionnan cientifico ta atribui e aumento den cantidad di caso na un relahacion di vacunacion den ultimo lunanan.
Presidente Jair Bolsonaro, cu ta rechasa e gravedad di e pandemia, ta gaba di no a vacuna y tabata un di e voznan principal na Brazil den contra di inmunisacion.
