(AP) — Britney Spears a wordo solicita pa papia cu corte tocante e conservatorship cu a controla su bida y finanzas pa 13 aña, su abogado a bisa diamars, y un hues a programa un fecha na juni pa tende di dje.
Abogado di Spears nombra pa corte, Samuel Ingham III, a bisa den un audiencia na Corte Superior di Los Angeles cu el a pidi pa papia cu corte pronto, y a bay di acuerdo cu hues Brenda Penny riba e fecha dia 23 di juni. E no a bisa kico specificamente Spears lo kier bisa.
Lo ta e prome biaha conoci den mas di dos aña cu e strea di pop, di 39 aña di edad, a papia den corte. E ultimo biaha, dia 10 di mei 2019, e corte tabata seya. Nada di loke el a bisa a bira conoci pa publico.
E hues tambe por cera e audiencia na juni for di medionan di comunicacion y publico. Pero Spears, a traves di Ingham, ta pushando pa mas transparencia den e proceduranan di corte y documentonan di e conservatorship.
Spears no a participa den e audiencia diamars, y inusualmente e ta presente durante esakinan.
Manera cu casi tur audiencia di Spears, alrededor di 50 fanatico di e movemento asina-yama ‘#FreeBritney’ a manifesta pafo di e corte.
Diamars nan a hiba borchi bisando ‘conservatorship ta sclavitud’ y ‘esaki ta toxico’.
Un muhe, cu un t-shirt #FreeBritney bisti, tabatin cabes feita durante e demostracion den solidaridad cu Spears, kende famosamente a feita su propio cabes momentonan prome cu a pone e conservatorship na luga na 2008.
Spears mes a bisa den documentonan di corte y riba rednan social cu e ta duna bonbini na e sosten p’e y scrutinio di su circunstancianan cu a bin di fanaticonan.
Mediante Ingham, el a pusha den corte pa cada bes ehecuta mas control riba su bida y finanzas. Pero ainda e mester solicita corte pa termina su conservatorship.
