(AP) – Glaciarnan ta smelt mas lihe, perdiendo 31% mas sneeuw y ijs pa aña compara cu 15 aña pasa, segun medidanan tridimensional di satelite di henter e glaciarnan di montaña na mundo.
Cientificonan ta culpa cambio climatico causa pa ser humano.
Usando 20 aña di data di satelite recientemente desclasifica, cientificonan a calcula cu e 220mil glaciar di montaña mundial ta perdiendo mas di 328 biyon ton di ijs y sneeuw pa aña desde 2015, segun un estudio diaranson den journal Nature. Esey ta suficiente smelt ta circula den e oceannan cada bes mas halto na mundo pa pone Suisa bao casi 7.2 meter di awa cada aña.
E velocidad di smelt di 2015 pa 2019 ta 78 biyon mas ton pa aña cu loke tabata di 2000 pa 2004. ‘Thinning rate’ global, diferente di volumen di awa perdi, a duplica den ultimo 20 aña y ‘esey ta enorme’, segun Romain Hugonnet, un glaciologo na Eeth Zurich y universidad di Toulouse na Francia, kende a lidera e estudio.
Mita di e perdida mundial di glaciar ta bin di Merca y Canada.
E velocidad di smelt na Alaska ta ‘entre esunnan mas halto riba e planeta’, cu e glaciar Columbia perdiendo alrededor di 35 meter pa aña, Hugonnet a bisa.
Casi tur glaciar di mundo ta smelt, hasta esnan na Tibet cu antes tabata stabiel, segun e estudio. Excepto pa algun na Iceland y Scandinavia cu ta alimenta pa aumento di precipitacion, e velocidad di smelt ta acelerando rond mundo.
E smelt casi uniform ta ‘iguala e aumento den temperatura global’ y ta bin di kimamento di carbon, oil y gas, Hugonnet a bisa.
E estudio aki ta e prome pa usa imagen tridimensional di satelite pa examina tur glaciar na Tera cu no ta conecta na e capa di ijs na Greenland y Antartica. Estudionan anterior sea a usa solamente un fraccion di e glaciarnan of a calcula e perdida di e glaciarnan usando medida di gravedad for di orbita. E lecturanan di gravedad aki tin margen di eror grandi y no ta mesun util, Zemp a bisa.
Reduccion di glaciar ta un problema pa miyones di persona cu ta depende riba temporada di smelt di glaciar pa awa diario, y e smelt rapido por causa brote mortal di lagonan di glaciar na luganan manera India, Hugonnet a bisa.
Pero e menasa mas grandi ta elevacion di nivel di lama. Oceannan mundial ya ta elevando pasobra awa cayente ta expande y pasobra capanan di ijs ta smelt na Greenland y Antartica, pero glaciarnan ta responsabel pa 21% di elevacion di nivel di lama, mas cu capa di ijs, segun e estudio. E capa di ijs ta mas tanto menasa a largo plaso pa nivel di lama.
