AMSTERDAM – Recientemente e comision di Europa ta urgiendo Hulanda y 22 otro paisnan pa stop cu e dunamento di visa y paspoort di oro pa inversionistanan stranhero , pa motibo di riesgo cu por involucra fondonan criminal.
E comision a bisa den un informe nobo diaranson ultimo, cu ta permiti e personanan paga pa cuidadania of pa residencia ta representa un riesgo grave pa e propio pais, pero si nan tin na cuenta di e reglanan di circulacion liber, tin un impacto den full e union. Bulgaria, Cyprus y Malta ta otorga cuidadania na e inversionistanan stranhero sin exigi cu nan biba den e paisnan ey di UE a cambio di tarifanan eleva. Y Hulanda ta un di e 20 paisnan cu ta ofreciendo permit di residencia a cambio di un pago. Na Hulanda, personanan por keda califica pa un permiso si nan inverti 1,25 miyon di euro pa un empresa innova of den un empresa cu tin un balor pa economia Hulandes.
E comision a bisa , cu tin un falta di transparencia y supervision pa e plannan di residencia, incluyendo masha poco estadistica tocante cuanto persona ta obtene un permiso di residencia di e manera aki.
Tin plan pa establece un grupo di experto pa asina mehora e supervision di e permisonan. Ta bisa cu Spaña, Cyprus, Portugal y Britania ta esunnan cu mas ta gana financieramente pa opera e permisonan aki. Un vocero di Ministerio di relacionnan Exterior a bisa Volkskrant cu e funcionarionan ta studiando e posibilidad pa aboli e sistema Hulandes.
