Un enfermero cu tabata suppose di cuida un muhe incapacita den un facilidad di cuido di salud pa tempo largo, a ser acusa di viola e muhe, simanna despues di e sorpresa di a duna luz na un yiu homber, segun declaracion di polis di Phoenix.

Investigadornan a aresta Nathan Sutherland, un enfermero certifica, bao sospecho di asalto sexual y abuso di adulto vulnerable, hefe di polis di Phoenix Jeri Williams a bisa. “Nos debe e aresto aki na e victima. Nos debe su aresto na e miembro mas nobo di comunidad, e baby inocente ey,” Williams a bisa.
E nacemento sorpresivo luna pasa a causa revision di parti di autoridadnan estatal di normanan di control pa sigura bienestar di pacientnan cu ta severamente discapacita o incapacita. El a causa tambe cu autoridadnan a bay test DNA di tur e hombernan trahando na e facilidad yama Hacienda HealthCare.

Sutherland, di 36 aña di edad, a entrega su muestra di DNA bao orden dii corte diamars pasa y e resultado a bin un par di ora despues, mustrando cu e tabata un ‘match’ cu e baby. El a nenga di papia y a recuri na su derecho bao di articulo 5 di constitucion, segun vocero di polis Tommy Thompson.

Sutherland, bisti cu T-shirt, carson deportivo y jacket preto, a aparece den corte ayera. Un hues comisario di Corte Superior di Maricopa County a ordena su libertad provisional riba un fianza di US$ 500.000 den cash so. E mester carga un aparato di monitoreo electronico tambe.

Abogado di Sutherland, David Gregan, a pidi pa un fianza mas abao, argumentando un pasado sin antecedente hudicial. El a describi Sutherland como un homber di famia cu yiu chikito, cu a biba na Arizona desde 1993. “No tin evidencia directo cu sr. Sutherland a comete e actonan aki,” Gregan a bisa. “Mi sa na e punto aki cu tin DNA. Pero e lo tin e derecho di tin su propio experto di DNA.”