Diabierna anochi, Clarette Quandus, a presenta su buki ‘Elegante Poeta’ den e sala di exposicion di Biblioteca Nacional Aruba (BNA). E presentacion a conta cu presencia di Ministernan, Rudy Lampe y Glenbert Croes, y tambe di Parlamentario, Shailiny Tromp-Lee. Tambe tabata presente Directora di BNA, Astrid Britten y Directora di departamento di Arubiana Caribiana, Des Croes, entre otro invitadonan.
E autor a declara na Bon Dia Aruba su emocion cu e publicacion di su buki nobo, y tambe cu e presencia di hopi hende cu a bin pa e presentacion y bautismo di Elegante Poeta. El a cuminsa un aña pasa traha riba su buki y awor el a bin cu un publicacion di 250 buki di e proyecto bibliografico aki cu ayudo financiero di UNOCA.
Elegante Poeta ta e di cuater buki cu Clarette Quandus a yega di publica di e genero di poesia y na Papiamento. E obra nobo aki ta wordo dedica na nos difunto Mama di Cultura, Bernadina Growell y tambe na e gran estadista, Betico Croes. Pero tambe na nos Papiamento y melodianan di e islanan ABC. Nan ta 19 poesia y el a inspira su mes pa traha e buki aki den cuadro di Aña Nacional di Papiamento 2018.
Clarette a cuminsa skirbi verso cu 8 aña di edad, y despues cu 16 aña a cuminsa skirbi mas obra literario den genero di poesia. E biaha aki e kier gradici entre otro meneer Ito Tromp kende a realisa e trabou di coreccion di e buki na Papiamento. Tambe na e artista Elvis Tromp kende a ilustra e buki tanto riba su portada como paden. Pero specialmente e kier gradici directora di UNOCA cu ta e fundacion cu a financia e buki. E buki aki ta obtenibel den diferente libreria y cerca e autor mes.
