Conseho di Minister a reuni cu CAFT diabierna ultimo. CAFT di su banda a trece dilanti cu e debe di pais Aruba ta hopi halto, y p’esey mester tuma decisionnan structural pa baha e debe. Gobierno di Aruba lo cuminsa baha e debe na aña 2020, momento cu e prome surplus wordo realisa riba presupuesto.

Segun un comunicado di gobierno, pa loke ta trata e aña 2019, CAFT a indica cu e norma palabra lo wordo alcansa, y a expresa su reconocemento pa e esfuersonan di Gobierno pa logra y hasta ta mustra cu nos lo ta miho para cu den e protocol ta indica.

CAFT a expresa e preocupacion pa cu gasto di personal. Ta hopi importante pa por controla nan miho y pa baha e gastonan aki. E unico forma cu pais Aruba por sali sigur di e problemanan financiero, ta si baha e gastonan di personal. Tambe CAFT a enfatisa e importancia di e Reforma Fiscal, pa asina garantisa e entradanan di gobiernonan den futuro.

Di parti di Gobierno, Minister President Evelyn Wever-Croes a describi e desaroyonan positivo di nos pais. Economia y turismo ta creciendo, desempleo ta bahando, y pa prome biaha den hopi tempo ta trahando riba un presupuesto balansa, sin deficit. Ta p’esey Minister President a expresa su desapunto pa e conseho di CAFT pa duna Aruba un aanwijzing y a indica cu Gobierno ta manteniedo su mes na e normanan palabra cu Hulanda. Tambe pa loke ta trata e fondo di Sociaal Crisisplan, Gobierno di Aruba ta manteniendo su mes na palabracionnan. P’esey Gobierno ta desapunta cu toch CAFT ta conseha pa manda Aruba un aanwijzing, segun e comunicado.

Segun e comunicado, tambe a elabora riba e retonan, entre otro riba e tema di Venezuela y e situacion cu refineria. E reunion a bay den bon esfera. Ta obvio cu CAFT ta sigui preocupa y lo kier mira Gobierno tuma mas paso pa garantisa cu Aruba lo no cay nunca mas den e problemanan financiero cu nos pais ta aden. Gobierno tambe ta comparti e pensamento ey.

“Tanten cu nos Gobierno ta na mando, mi por garantisa un bon maneho financiero di nos pais. Locual cu nos mester evita ta pa nos pais cay bek den man di gobernantenan iresponsabel cu a redobla e debe di nos pais y riba dje tabata tin e curashi di pidi cada ciudadano pa paga e debe bek, cu orguyo. Riba cada baby cu nace awe tin un debe di 40 mil florin. Esaki ta e resultado di e pio maneho financiero cu nos pais a pasa aden. Entrante otro aña e rumbo ta cambia y nos ta cuminsa paga debe bek. Pa asina crea un miho futuro pa nos yiunan y nan yiunan” Minister President Evelyn Wever-Croes a duna di conoce