Ta den temporada di fin di aña y e ta un custumber di Arubiano pa haci cas y rond di cas limpi. Pero Bureau City Inspector tambe ta prepara pa ta confronta cu algun hende ta benta e sushi banda di caminda.

Pesey mes, vocero di e servicio Robby Rosel  ta urgi comunidad pa tene cuenta cu locual ta pone riba caminda publico. “Nos di Bureau City Inspector ta encarga cu locual ta riba caminda publico. Nos lo ta controlando dilanti, na banda y patras di casnan,” Rosel a bisa, “si ta trata aki di tereno di Gobierno.

Tene cuenta cu si ta haci cas limpi pa no saca e sushedad pone riba caminda publico, pasobra esaki ta tarea di BCI pa controla. Nos kier pidi tur hende pa e temporada aki, pa mantene bo bario, mantene Aruba limpi.”

Rosel a corda tur hende pa percura cu ora ta transporta matanan corta pa dump, nan mester ta tapa cu lona pa evita cu nan ta plama. “Corda cu esaki ta basa riba ley, y polis por duna boet. Ora cu ta transporta desperdicio, tapa esaki pa evita cu nan ta plama y susha e isla.”

Autonan bieu

Vocero di BCI a papia tambe di e problema di auto bieu plama rond Aruba. Tin hende cu ta cumpra auto bieu, y ta para esakinan riba tereno publico. Tereno publico ta cay bou di DIP y e control di terenonan publico ta den man di Bureau City Inspector. Na momento cu mester detecta auto bieu riba caminda publico, BCI ta manda notificacion pa DIP cu e momento ey por instrui pa kita autonan bieu for di e terenonan publico.

Santananan sushi

Otro preocupacion di Bureau City Inspector ta e condicion di sushedad den of rond di santananan na Aruba. Y e prome dianan di November ta recorda tur persona fayece. Y hopi hende na Aruba tin e custumber di drecha graf di nan sernan keri. Y pa e motibo ey mes, BCI ta pidi tur parokia, Pastoor y esunnan encarga cu mantencion di santana, pa percura cu tin bari of baki di sushi pa e trabounan aki. “Pone un baki di sushi, pa asina personanan cu ta haci graf di nan sernan keri limpi por tira sushi den dje.”

Pero pa BCI e ta preocupante pa mira cu te ainda Santana Publico na Playa ta den un condicion deplorabel. Ora cu companianan cu mester busca e sushinan na e santana, e ta cera na yabi. “Ban tene cuenta cu mester saca e sushinan aki. P’esey nos tin e suplica, pa no solamente cu ta pone flornan den santana, pero ban mantene nan limpi.”

Mester bisa cu Bon Dia Aruba a pasa mira e santana publico na Playa y a haya esaki den condicion limpi. A tuma contacto cu Hefe di BCI sr. Kevin Peterson, kende a reacciona contento, ya cu tabatin algun siman caba cu a pidi DOW pa yuda cu e limpiesa. E santana publico na Sabana Basora tambe ta cay bou maneho di DOW y regularmente ta busca sushi cu ta pone pafo di cura. Problema ta cu otro hende tambe ta bin tira sushi na e sitio cu ta crea un impression eroneo cu tur ta procedente di e santana, ademas cu ta crea mas trabou pa DOW mes, a informa Bon Dia Aruba.

Boet

Comunidad mester ta consciente cu si no cumpli cu reglanan pa limpiesa, BCI por duna boet y ta haciendo esaki cu ayudo di Ministerio Publico. Ta pendiente e decreto nacional pa realmente por publica tur e datonan, incluso pa duna informacion cuanto boet a duna caba. “Nos ta duna como cuater a cinco  boet pa dia. Nos no tin un suma total ainda, pasobra ta pendiente e decreto nacional. Na e momentonan aki, ta Ministerio Publico ta determina e nivel di boet,” Robby Rosel a splica.