Diamars marduga Polis maritimo riba tera patruyando hunto cu Kustwacht a tuma nota cu un boto cu basta ilegal a yega tera. Esaki ta indica door di e varios vest cu polis a topa cu ne na canto di lama pero segun vocero di Kustwacht, nan no ta na altura di e cantidad di hende cu tabata den e boto ni for di unda e boto por a bin.
Segun informacion di Vocero di Warda Costa, Sr. Roderick Gouverneur, diamars marduga den careda di 1:30am, Warda Costa a haya un notificacion cu tin un boto riba rif anto mesora a saca un patruya di tera y notifica KPA. ”KPA a manda tres patruya. Yegando eynan nos no a haya ningun hende pero si a detecta algun paña muha y otro cosnan cu a haya. A busca den e area, polis y Warda Costa a haci nan buskeda awe tambe durante dia tabata tin helicopter cu a haci un buskeda pa wak si nan por a haya algo pero esey tampoco no a duna resultado.” Sr. Gouverneur ta splica Bon Dia. No a mira ningun hende ta cana den mondi ni nada pero ta sospecha si cu tin hende pero no ta na altura cuanto hende por a drenta. Mas informacion no por tin actualmente, e boto tabata basta destrui y riba ordo di fiscal pa ruim op e boto tambe segun Sr. Gouverneur. No tin ningun indicacion tampoco for di unda e boto aki por a bin. Tabata mustra cu net e personanan aki a yega tera y di biaha a start un buskeda grandi den e area, mientras e boto mes a keda pega den seco, polis a topa cu varios vest na canto di lama. Hasta marcanan di pia muha por a mira ta core subi tera y na varios otro luga mas den Sero Colorado, e personanan aki sa bon unda pa sconde cu tabata poco pa autoridad garanan e momento ey.
Caminda di cruz pa haya informacion
Bon Dia a comunica cu diferente persona y instancia concerni pero ta continua canando un caminda di cruz pa por colecta algun informacion of detaye relevante riba e caso aki y tambe na con frecuente esaki ta pasa. Segun fuente anonimo sinembargo, e tipo di sucedidonan aki ta pasa frecuentemente caminda cu ta cierto casonan so ta wordo publica. Den otro palabra, por tin hopi mas ilegal ta drenta Aruba di locual pueblo ta kere? Pa confirma esaki Bon Dia ta bay sigui purba di yega na expertonan y instancianan concerni cu seguramente mester ta hopi ocupa ta manehando e asuntonan aki.
