Mediador di Gobierno, Sr. Anselmo Pontilius a declara na Bon Dia Aruba cu trahadonan di Aruparking lo tene un referendum pa busca representacion sindical. E sindicato STA ta esun cu a pidi e referendum aki y el a cumpli cabalmente cu e rekisitonan cu e ley di referendum ta exigi, asina Sr. Pontilius a laga sa.
El a bisa cu pa e referendum aki a cumpli pa loke ta e reglanan y den caso aki e referendum lo tuma luga dialuna awor dia 15 di augustus proximo pa 8:30am. Sr. Pontilius a indica cu tur partido ta na haltura cu e referendum lo tuma luga den e sede di Mediador di Gobierno riba e fecha y ora stipula ariba.
E ta calcula cu alrededor di 26 trahado tin derecho di voto. Aruparking ta un empresa estatal nobo cu ta cay bou responsabilidad di Arubus. El a bisa cu e trahadonan a pidi pa e sindicato representa nan y dialuna proximo nan tin oportunidad di expresa su boluntad pa medio di nan voto.
Regla di referendum
Sr. Pontilius a indica cu STA sin duda a cumpli cu e regla di referendum y esaki tabata un motibo tambe cu a wordo fiha fecha y nan a publica den medio di comunicacion. Nan ta pendiente awor pa e referendum tuma luga entrante otro siman.
E otro referendum cu sindicato STA a pidi pa e trahadonan di departamento di produccion den WEB, ainda nan no a cumpli cu e reglanan exigi pa e ley di referendum. E tin di haber cu e total di formulario cu e sindicato mester a entrega na oficina di Mediador di Gobierno pa asina nan por constata cu mayoria di e trahado di e departamento menciona ta di acuerdo pa convoca un referendum. Teniendo na cuenta cu parti di e ley aki y mirando cu e sindicato no a cumpli cu ne, a wordo cancela e referendum. E no ta un caso excepcional ya cu e aña aki oficina di Mediador di Gobierno a yega di cancela dos referendum cu e sindicato a pidi asumiendo cu e tin mayoria, pero e no a demostra nan.
