(Infobae) – Un grupo di investigadornan di University of Queensland y University of New South Wales (UNSW) a desaroya un cacalaca robotico cu por administra medicamento di emergencia na personanan pega den edificio cu a cay, cuebanan y otro luganan dificil pa yega.
E tecnologia ta representa un avance den combinacion di biologia y robotica aplica na operacionnan di rescate. E sistema, cu ta yama Paraborgs, ta combina e capacidad natural di insectonan pa move den espacionan estrecho y zona yen di escombro cu electronica liviano y aparatonan controla na distancia.
A diferencia di robotnan chikito convencional, e cacalaca aki por drenta den buraco y espacio caminda un aparato cu wiel of robot mas grandi por keda pega.
Cada insecto por ser ekipa cu camara pa manda imagen den tempo real of cu un mecanismo pa administra automaticamente medicamento di emergencia.
Pruebanan ta mustra resultado prometedor
Un di e desafionan tecnico mas grandi tabata logra e cacalaca posiciona su mes corectamente pa haci un inyeccion.
E insecto mester acerca e persona of obhetivo, keda stabiel y activa e inyector cu suficiente precision.
Durante pruebanan pa demostra cu e concepto ta funciona, Paraborgs a logra un cifra di exito di 95% den inyeccionnan na distancia cortico, haci for di menos di 15 centimeter di e obhetivo.
Ora a combina nabegacion y inyeccion den un solo tarea, e sistema a completa 72% di e pruebanan exitosamente.
E investigadornan ta reconoce cu ainda mester haci mas desaroyo y prueba den condicionnan real prome cu por usa e tecnologia pa emergencianan di berdad.
