ORANJESTAD – Universidad di Aruba lo tin su opendag dia 6 di april, esaki ta sosode 2 bes pa aña. Natalie Solognier kende ta officer student affair na Universidad a splica locual lo pasa e dia ey y informacion cu lo tin pa duna comunidad di Aruba.

Solognier a bisa cu e opendag aki ta ser destina pa tur hende cu interesa pa sa kico Universidad di Aruba tin pa ofrece ‘si nan kier sa kico en berdad ta pasa tras di e porta di edificio’.

Agregando cu ‘hopi hende ta pasa y wak e edificio’ pero no sa precisamente kico ta pasa aden y kico tur nan tin di ofrece. E ta bisa e ta bon pa nan por wak pa motibo cu tin studiante cu no sa si tin e gana a studia na Universidad, of tin algun duda, pa e motibo ta bisa cu e ta pa tur edad. “Nos no ta enfoca riba esey, no edad specifico’.

Pa locual ta tipo di scol, Solognier ta bisa cu tampoco tin preferencia. “Nos tin variedad di programa cu nos ta ofrece. Nos tin un total di 4 facultad, esey ta e facultad di ley cu ta esun mas conoci,e facultad di accounting y marketing, facultad di hospitalidad y Turismo. Nos tin e facultad di arte y ciencia cu bou di cada un, tin nan diferente programa.

Un ehempel cu el a menciona di arte y ciencia cu tin dos programa bou di dje cu ta ‘social work y development y organization governance and management’ trabou social y desaroyo hunto cu organisacion gobernacion y maneho. El a agrega cu nan lo tin un programa nobo cu lo cuminsa na augustus.

Solognier ta agrega cu tur esey lo bay tin pa duna informacion di programa durante e dia. Bon Dia Aruba a puntra Solognier di e estudio di Wiskunde cu Universidad di Aruba tabata tin. “Pa locual ta wiskunde nos ta pendiente ainda, no tin nada concreto di esey pues mi no tin durf di bisa nada. Si tin un cambio nos lo anuncia den prensa di e parti ey.”

Tambe a puntra Solognier si a nota cambio den studiante di Aruba cu ta prefera keda studia aki en bes di bay Hulanda of otro pais pa sigui nan estudio? E ta contesta cu ta ripara e cambio ‘e ta creciendo poco poco no den un escala grandi’ agregando cu si cada aña nan ta haya mas studiante cu ta inscribi na Universidad di Aruba.

Sinembargo e ta bisa cu e studiante ta ripara cu Aruba ta brinda oportunidad. “Banda di studia aki na Aruba, e ta haci e proceso mas barata, e studiante ta keda cu su mayornan, no tin mester di paga huur pues e costo ta mas abou. Universidad tambe ta ofrece e parti cu awo e studiante por haci intercambio den e di 2 y 3 aña, unda cu e por bay na Europa cu e programa Erasmus.”

Solognier ta bisa esey ta yama e atencion di studiante, pa motibo cu nan ta haya oportunidad di bay afo y haya e experiencia di keda 6 luna afo. Agregando cu tambe nan por haci nan stage afo. E ta remarca cu esey ta haci e studiante ta prefera pa studia na Aruba. Lo duna mas informacion riba e tema aki na opendag.

El a remarca cu e aña aki, nan lo tin un edicion special. “Mi ta bisa special pa motibo cu a ripara cu mas mayornan kier ta envolvi cu nan yiu. Nan tin pregunta cu preocupacion, cu esey nos ta aby tin session dedica na e mayornan cu ta bay wordo duna pa mi colega Charisse Hoen – Daly. Lo tin e mayornan cu lo papia di nan yiu, kico nan wak como mayor di e cambio y beneficio cu nan ta ripara cu nan yiunan tin ora di studia na Aruba.

Pa finalisa sra. Solognier a splica cu lo tin e programa nobo, cu ta yama Sisstem. “E programa ta bay enfoca cu e sostebinilidad y green energy. Di esaki tambe lo bay wordo duna si tin interes, unda lo tin informacion general specialmente pa esaki.