Cada dos siman mas of menos un idioma ta disparce

Diaranson ultimo tabatin cuater motibo pa celebra Dia Internacional di Lenga Materno.

Presidente di fundacion Lanta Papiamento (FLP), Etlien Croes a bisa cu e motibonan tin di haber cu Aña di Papiamento; Dia Internacional di Lenga Materno; 15 aña di oficialisacion di Papiamento y tambe e lansamento di e aplicacion (app) online pa check ortografia di Papiamento. Segun sra. Croes, nos lenga Papiamento ta ‘riba bon caminda’.

Durante un acto cultural organisa na Biblioteca Nacional Aruba (BNA), sra. Croes a elabora su discurso a base di un mensahe di UNESCO en conexion cu Dia Internacional di Lenga Materno. E organisacion aki a enfatisa su compromiso pa promove diversidad linguistico, caminda nan ta invita tur e paisnan pa celebra e dia aki den mas tanto idioma posibel. “Pa corda tur hende cu diversidad linguistico y multilingualismo ta esencial pa un desaroyo sostenibel”, el a bisa.

E ta haya cu Aruba ta ariba e bon caminda cu e decision di introduci oficialmente scol multilingual cu ta promove e metanan di UNESCO pa e añanan venidero. Presidente di FLP a sugeri pa haci uzo di e app cu a keda introduci. Pero tambe pa nos tur purba di uza menos palabra di otro idioma. “Aunke e no ta facil pasobra tur pais of isla multicultural lo tin e problema cu e mescla di palabra den otro.”

Meta UNESCO
E meta di celebracion aki pa UNESCO ta preserva diversidad linguistico y promove enseñansa multilingual basa ariba lenga materno. Segun UNESCO, e diversidad linguistico ta mas den peliger como cu mas idioma ta disparce. Cada dos siman mas of menos un idioma ta disparce. Cu e consecuencia cu hunto cu esaki, henter un cultura y herencia intelectual ta disparce.

Sinembargo nan por constata progreso den enseñansa multilingual basa ariba idioma materno. Como cu a cuminsa reconoce su importancia, specialmente den e prome añanan di scol. Tambe el a señala algun meta di UNESCO riba desaroyo sostenibel ta dirigi riba enseñansa. Un meta tin di haber cu alfabetisacion universal di hubentud. Pa aña 2030 tur hoben y un cantidad substancial di adulto mester por lesa y skirbi.

Otro meta pa e aña ey ta cu tur hoben mester adkiri conocemento y habilidad necesario pa promove desaroyo sostenibel, derecho humano, igualdad di sexo, cultura di paz y no violencia. Tambe civismo global y aprecio pa diversidad cultural.