Caft a sali fuerte riba gobierno

Finalmente e colegio di supervision financiero CAFT a mustra di no ta kere tur e storianan bunita cu gobierno a pone den su presupuesto 2017 y su analisis di riesgo encuanto e reapertura di e refineria. Un serie di aspecto contradictorio e organo supervisorio aki a señala, riba cual nan ta desea clarificacion. Y esaki dentro di dos siman, manera ley ta bisa. E carta cu gobierno di Aruba a haya ta fecha 11 di januari.

Specificamente CAFT ta pone enfasis riba cierto entradanan di gobierno cu no ta cuadra, ni den comparacion cu 2015, ni cu e resultadonan anticipa, a base di e cifranan pa tres kwartaal di 2016, cu ta disponibel desde november ultimo. Nan ta menciona por ehemplo loonbelasting, cu pa 2016 caba tabata basa riba un proyeccion exagera, cu despues di nuebe luna a resulta di ta cana pareu cu 2015, pero no e aumento grandi cu gobierno tabata spera. Den e caso aki a anticipa di haya na 2015 alrededor di 262 miyon florin, mientras cu finalmente a haya Afl. 248 miyon so. Asina mes, gobierno a tuma e proyeccion exagera aki pa calcula pa 2016 un suma di Afl. 270 miyon. CAFT:”E resultadonan di e prome tres kwartaalnan di 2016 sin embargo ta practicamente identico na e resultadonan di e mesun periodo na 2015. Por lo tanto ta mustra cu e entradanan final na 2016 no lo yega na e suma presupuesta. Asina mes a sigui aumenta e post aki den e presupuesto 2017 te na Afl. 309 miyon.”

Esaki en berdad ta hopi straño, si den e calculacionnan di Banco Central nan ta tuma como punto di salida cu e total na salario paga pa motibo di e inversionnan na 2017 lo por yega na Afl. 22 miyon.  Y gobierno kier cobra mas cu esey na loonbelasting!? ‘A otro perro con ese hueso’, CAFT a bisa, aunke nos no sa si prof. Bakker conoce e expresion ey… Ademas, gobierno mes den su analisis di riesgo, manera CAFT ta señala, ta balora e efecto positivo di e reapertura riba loonbelasting na solamente Afl. 4 miyon pa 2017. Ta di unda e resto mester bin, di nos economia stagna?

Igualmente asina e calculacion di BBO pa 2017. Den e editorial aki algun tempo pasa nos a trata e caso di e impuesto aki tambe, cu pa 2016 despues di tres kwartaal tabata cana pareu cu 2015, es decir yegando pa henter aña na un total di Afl. 93 miyon. Optimistanan di Finanza a calcula cu 2016 lo a trece aden Afl. 112 miyon, ignorando e situacion den nos economia y contando cu entrada di e actividadnan genera pa e refineria cu tampoco tabat’ey. Pa 2017 a uza e base irealistico aki pa proyecta un BBO di Afl. 124,5 miyon, un aumento di 33% compara cu e cifranan berdadero di 2015. Pa colmo, mescos cu loonbelasting, den e analisis di riesgo ta calcula e aporte na BBO di e refineria na solamente Afl. 5 miyon, lagando espacio pa esnan cu hopi fantasia pa inventa di unda e resta lo mester bin, si Banco Central ta mirando un economia den recesion actualmente.

 

caft.jpg

Gobierno den su defensa ta trece dilanti cu e accionnan intensifica di cobranza ta trece placa extra aden. Sin embargo, CAFT ta reacciona bisando cu e accionnan aki ta coriendo desde 2014 caba y te awor no tabatin resultado asina alentador.

Di otro banda, CAFT ta ripiti su observacion cu nan no ta mira cambio structural den maneho di entrada ni di gasto, y gobierno ta continua aumentando gasto di un banda, y di otro banda cubriendo buraco cu beneficio incidental, manera den e caso aki e pago pa cu e settlement cu Valero, y e benta previsto di e compania di importacion y distribucion di combustibel na un compania priva local. No ta bisa ainda ken e cumprado ta, pero e lista di hende cu ta bon cu gobierno y tin e recursonan pa hacie ta hopi cortico…

Pero pakico awor CAFT a sali asina fuerte contra gobierno di Aruba, mientras cu tabata tende e critica cu Aruba tabata haya un trato cu ‘handschoen di felpa’ di CAFT y Hulanda? Pa cuminsa, CAFT a warda gobierno produci nan ‘risico-analyse’ pa nan reacciona y por bisa cu nan a sali ‘por la goma’, tambe talbes pa mantene nan credibilidad. Pero loke den trasfondo tambe ta hunga un papel importante pa Hulanda, ta e asunto di un eventual peticion di Aruba pa por haya Hulanda inscribi riba un emision di bono di Aruba cu un interes hopi abao, casi riba e nivel cu Hulanda mes ta haya placa fia riba mercado internacional. Cu esaki Aruba lo por spaar hopi placa, cu por usa o maluza pa otro cos. Sin embargo, nan no ta haya esaki regala, y Hulanda ta dicidi pa mira un miho maneho financiero, cu ta encera baha gasto di personal. Claro cu, en bista di eleccion na september, gobierno no kier tende mes di haci algo al respecto. Asina por ta cu nos ta mira Aruba ‘heat up’ proximamente, pero no solamente pa carnaval.

You May Also Like

editorial 2_44.jpg

Become Energized

Man bun bespoke freegan, kitsch retro ethical banh mi williamsburg drinking vinegar sustainable heirloom ...

Tanto bal ley sin inspeccion…

Y ken mester supervisa? Nos a tuma nota di e grito al cielo reciente ...

Cas di Cultura: consecuencia di situacion financiero

Den e dianan cu a pasa nos por a tende cantidad di opinion tocante ...

editorial 2_15_1.jpg

Presupuesto aproba no ta cambia realidad

Awor si gobierno mester di Citgo Tratamento di presupuesto 2017 ta yega su fin ...

Kico mester ta nos maneho di refugiado?

Den nos edicion di ayera un di nos editornan a bay riba e tema ...

editorial 2_15_1.jpg

Banco Central ta mantene opinion di deficit 2015..Deficit tabata 4.2% di GDP fin di 2015

Banco Central a caba di publica su analisis anual di nos economia: e Annual ...