Un devastacion riba nivel di salud, economico y social a dal Aruba dia 13 di Maart 2020 y a hinca Aruba den su pio crisis den decadanan. Asina Presidente di Camara di Comercio Omar Tromp a bisa na inicio di e debate di lidernan politico, organisa pa Camara di Comercio y Universidad di Aruba.

Tromp a bisa cu e crisis a dal na momento cu economia di Aruba ya tabata poco zwak, cu un finanzas publico yen di reto y un debe nacional demasiado grandi. Y p’esey tabata kier tende di e lidernan politico kico ta nan solucion. “Cada Arubiano, cada baby cu nace ya tin un debe di 54 mil florin.” Tromp a urgi e partidonan politico pa no pensa riba e siguiente eleccion, pero enfoca a termino largo y planta un simia na beneficio di nan yiunan.

E debate tabata parti den tres tanda, cu a trata 11 topico, for di finanzas publico te cuido medico.

 

No tabatin debate

Sinembargo, e tabata mas bien un sesion di pregunta, cu ta duna poco espacio pa e lidernan politico realmente bay den ponencia di e otro. Ademas e proceso di pregunta tabata parti den tres tanda, unda inicialmente a usa pregunta graba di publico, un ronda di pregunta formula pa un comision special y despues otro tanda di 12 pregunta cu publico a manda aden. E resultado tabata cu cierto preguntanan tabata similar.

Mirando cu tabatin 12 lider, no tur por a contesta tur e preguntanan sino cu un sistema digital tabata scoge pa ta e partidonan, tres inicialmente y despues dos, por a contesta e preguntanan. E sistema aki ta limita e partidonan of hasta e personanan cu a lansa e pregunta, pa dirigi uno na un partido specifico.

Preguntanan

El a cuminza cu e prome pregunta di publico riba futuro di caya grandi, y aki lider di PPA Lisette Malmbert bisa Caya Grandi mester bira un area combina di vivienda, comercio y cu industria creativo pa sostene e actividadnan. Seraida Pemberton, lider di UPP a expande e contesta pa inclui Caya Grandi di San Nicolas y a bisa cu ambos ta beneficia si hisa siguridad. Pemberton a sugeri pa pensa pa hala e negoshi di prostitucion for di Caya Grandi di San Nicolas pa asina permiti mas actividad pa famianan. Lider di MAS, Marisol Lopez Tromp a bisa cu basa riba su experiencia un di e retonan ta e hecho cu e edificionan di Caya Grandi na Playa ta particular y cu mester yega na acuerdonan pa asina hisa efectividad di nan uso. Pero en todo caso, apartamento pa studiante lo yega genera biba den Caya Grandi.

Pa loke ta e topico di Enseñansa, tur partido a enfoca e balor. Lider di AVP Mike Eman kier drenta den dialogo cu scolnan y docentenan riba e reformanan necesario, Gilbert Webb di HTC kier un Universidad nobo cu 60 facultad pa brinda mas oportunidad pa hobennan y Miguel Mansur di Accion21 a bisa cu su partido tin su vision describi riba website, pero cu e enfoke ta inversion den sosten pa docente y percura pa muchanan haya habilidadnan bon pa siglo 21, unda musica y cultura ta sostene nan desaroyo cognitivo.

Ningun partido a priminti di baha edad di pensioen pero varios ta kere cu por duna espacio pa e persona scoge pa baha cu pensioen mas trempan. Eric Ras lider di CURPA ta bisa cu sigur esaki mester ta e opcion pa polis.

E tema di corupcion a bay pa MEP, PP y RED. Lider di MEP Evelyn Wever Croes a bisa cu su Gobierno a haci e tema di integridad algo cu por discuti riba dje, y a lanta e Bureau Integridad. Ricardo Croes di otro banda a bisa cu ta RED a percura pa integridad tabata den e programa di gobernacion di MEP-RED-POR, mientras cu Michael Williams di Pueblo Prome a bisa cu ta for di 2007 ta bringando contra corupcion, cuminzando cu e caso Namdar.

Pa loke ta reforma fiscal, Accion21, POR y PP tur a bisa di ta sostene e cambio di belasting directo pa e indirecto y ta apoya e introduccion di BTW. Mansur di Accion 21 a bisa cu lo traha segun e landspakket, cu tambe ta sugeri flexibilisacion laboral pa yuda comercio. Pero e economista a enfatisa cu e peso di sector publico mester baha.

Un tema cu sigur a capta atencion tabata e hecho cu 28 porciento di tur turista cu a yega Aruba desde Januari 2021, a scoge pa keda na cas en bes di hotel. Consecuentemente a puntra MAS, Raiz y AVP si e doñonan di acomodacionnan airbnb mester paga mesun tipo di belasting di hospedahe cu cualkier hotel. Marisol Lopez Tromp a bisa cu mester bin un areglo husto pa tur acomodacion, mientras cu Ursell Arends di Raiz a bisa cu mester a introduci e belasting aki hopi tempo pasa caba, segun palabracion. Lider di AVP Mike Eman di otro band ta considera cu e acomodacion airbnb ta di localnan cu ta gasta nan placa na Aruba cu ta contrario cu hotelnan grandi.

Refineria

Un biaha mas San Nicolas ta e centro di atencion di mayoria partido. HTC kier un parke di recreacion pa stimula actividad na San Nicolas, pero pa MEP, AVP y PP, e refineria ta e opcion. Williams di PP ta bisa cu e prome dia despues di sinta den Gobierno, lo por habri e refineria, mientras cu Wever Croes a bisa cu ta den proceso pa bolbe habri e refineria cu ta bay traha na forma limpi.

Mas pregunta

Cu excepcion di algun, mayoria partido tabata relativamente vago con ta bay soluciona e problemanan grandi di Aruba. E unico partido cu consecuentemente a papia cu mester traha segun e landspakket basa riba e acuerdo cu Hulanda tabata Accion21. Ni lider di MEP a haci esaki, a pesar di a firma e acuerdo. Lider di AVP Mike Eman un biaha a priminti cu su Gobierno lo alivia e peso riba ciudadano y mehora economia, pero no a bisa con ta atende cu e problema di debe di Pais Aruba.

No a yega na ningun conclusion den e debate ni e partidonan no a piki plan di otro afo. E tabata un sesion di pregunta y contesta cu segun comentarionan riba diferente plataforma social, a laga mas pregunta atras.