Awor cu e acuerdo cu Hulanda ta firma, por ripara tambe cu ta hopi cos mester sucede e aña aki ainda, pa cumpli cu e acuerdo. Esey ta conta pa e situacion financiero, unda en todo caso e ciudadano cu ta depende di ayudo Hulandes pa compensa nan entrada cu a cay afor por completo o parcialmente, por keda mas tranquil. Pero tin parti di e presupuesto cu mester finaliza ainda, pero cu e acuerdo firma ta cos cu mester por regla.

Otro asunto cu a hala nos atencion ta cu e discusion di poco luna pasa encuanto kico e asina yama ‘Wever-Croes-norm’ ta encera of no, awor a bin padilanti via un declaracion di nos Promer Ministro mes. Na luna di juni tabatin un reaccion bastante fuerte di banda gubernamental riba un Editorial di Bon Dia Aruba den cual a haci e pregunta si e norma menciona no mester a considera tambe inclui e prevision luhoso di pension di e mandatario (y parlamentarionan) den e beneficionan. Segun nos punto di vista mester a inclui esaki considerando cu e ta un tipo di entrada posponi, un beneficio pa cual e mandatario(nan) no ta contribui. Na su debido momento nan ta djis haya e beneficio, punto. Ademas, e ta un derecho cu e persona ta acumula den solamente 8 aña, algo cu otro hende ta traha henter nan bida p’e.

Nos ta contento di tende awor cu den e discusion con pa implementa e norma, a yega na reconoce cu pa haci un calculacion husto di e salario y beneficionan di e directornan di e empresanan estatal lo mester considera ambos componente di entrada. Na e momento aki segun declaracion di e mandatario ta laga un actuario calcula e beneficio aki. Den nos articulo di 9 di juni 2020 nos a duna caba un ‘ballpark figure’ cu nos a haya for di un experto cu tabata alrededor di 200.000 florin pa aña, mas cu e salario mes… Naturalmente caha di gobierno no ta sinti esaki directamente, pasobra ta pagando solamente pa esnan cu ya ta pensiona, pero ta keda e problema cu, asina leu cu nos sa, no ta reserva placa y ta paga e sumanan aki ‘out of pocket’, no e mihor manera pa maneha finanzas publico tampoco. Ta bon cu finalmente tur esaki ta ser considera pa yega na un norma transparente.

Otro asunto cu a atrae nos atencion ta cu e acuerdo di diabierna pasa a pone un fin na e discusion entre gobierno di Aruba y di Hulanda encuanto e forma den cual mester implementa e cooperacion hudicial den investigacion relaciona cu criminalidad cu ta traspasa frontera. Hulanda tabata desea pa basta tempo caba pa yega na un acuerdo pa cuerponan manera RST por opera independiente, mientras cu posicion en particular di ministro di Husticia tabata cu operacion na Aruba lo mester cay bao capa di Cuerpo Policial di Aruba. For di un punto di vista nacionalista esey ta parce estrictamente logico, esta e punto di vista di e ministro y varios parlamentario tambe, pero si nos bay pensa bon, e no ta make sense. E punto ta cu den casonan grandi, di criminalidad organisa, mester tuma lugar trabao di pre-investigacion cu por tuma luna, si no ta añas, cu riesgo grandi di leakmento di informacion prematuro. E investigacionnan aki no ta limita na trabao dentro di e aparato hudicial so, pero ta requeri un acercamento cuidadoso di otro entidadnan gubernamental o semi-gubernamental, cu di forma discreto mester duna nan cooperacion den e acumulacion di informacion cu por ta util den e investigacion. Tur esaki ta necesario pa finalmente por dal e pasonan sigur den e fase di actua contra e criminalnan concerni, sea aki o na otro teritorio. Actua anto den funcion di e confidencialidad aki no tin nada di haci cu no ta respeta autoridadnan na Aruba; e ta simplemente cu trabao hudicial semper conoce su momento di haya o duna informacion ‘on a need-to-know basis’; esey tur polis mester por comprende.

Pa basta tempo Aruba tabata e unico pais den Reino cu tabata nenga di firma e protocol pa e cooperacion den RST, na cual a yega un final awor aki, pasobra a pone esaki como condicion den e acuerdo. Den e landspakket den su ultimo version ta describi den palabra hopi cla cu no ta comparti e ponencia cu Aruba ta trece dilanti pa laga tur informacion core via Cuerpo Policial Aruba, pasobra “esaki ta dificulta e actividadnan di e teamnan di Criminele Inlichtingen y ta duna un riesgo grandi y absolutamente innecesario di daño (na trabao).” Ademas ta argumenta cu semper e Procurador General di Aruba ta keda e autoridad pa duna aprobacion pa duna informacion encuanto criminalidad autonomamente. Ta bira tempo pa cerca nos autoridadnan tambe penetra e idea cu nos ta parti di Reino y cu criminalidad ta tocando nos tur, sea riba e islanan o na otro banda di oceano. Cu criminalidad organisa cada vez mas sofistica nos no por maneha e tipo di tareanan aki nos so. Aki tambe nos tin un asunto unda orguyo no hustifica di kier haci tur cos nos mes, absolutamente no ta na su lugar. Ta parce cu den esaki tambe Hulanda no ta perdiendo tempo, pasobra Aruba tin cu tin e asunto regla pa dia 15 di december. Djis cumpli.

 

 

LEAVE A REPLY

Please enter your comment!
Please enter your name here