Candela dump Tamarijn a core habitantenan for di nan cas

Ayera mainta nan a informa autoridad  cu lo tin un candela basta grandi riba un dump priva na Tamarijn. E huma ta un molester grandi pa e bario y habitantenan no por mas cu e situacion. Riba nos pagina di Facebook Bon Dia 24, nos a mustra tambe con algun habitante a bay confronta e yiu di e doño anto esaki a hera bay for di man.

Ayera mainta Bon Dia Aruba a ricibi un yamada for di un habitante di Tamarijn desespera, na yoramento, suplicando pa prensa bin wak e situacion na Tamarijn. Aparentemente tin un dump chikito priva cu a pega su so na candela segun e yiu di e doño, Rawi Misier. Dos truck di brandweer a yega y drenta accion mesora pa combati e candela. Cu ayudo di chubato tabata logra pa domina e candela grandi un rato, pero e huma a keda durante henter e dia y ainda anochi. Esaki a forsa algun habitante cerca di e area pa bandona nan cas temporalmente. Specialmente esunnan cu ta biba den e direccion cu biento ta supla e huma.

A yega di pasa caba
Varios habitante a conta nos cu no ta prome biaha cu esaki ta pasa. Un habitante ta bisa nos cu: “Den 2012 algo asina ki a yega di pasa caba. Nos a reclama y nada a wordo haci.” Nan ta preocupa pa nan salud y varios persona den e area ya caba ta sufri di problemanan di curason segun un habitante ta conta nos. Habitante Fabia Croes ta conta nos cu: “Nos tin bastante tempo ta soporta e cos aki. Na 2012 ora cu esaki a pasa, e gastonan na mi cas a yega te na 3.000 florin. Pasobra nos mester a laba tur cos y benta tur cuminda afo. Tin biaha riba un diadomingo, bo kier sinta bebe un copi di koffie anto bo ta haya holo malo. Esaki nunca nos a yega di raporta, pero awo cu e situacion aki si e ta dimas.”

Dump priva ‘no ta ilegal’
E doño di e tereno mes no ta na Aruba. E yiu di e doño Rawi Misier ta bisa cu esaki no ta un dump ilegal unda cu ta permiti pa tira kico cu ta manera e dump na Parkietenbos. E ta bisa: “Akinan loke nan sa tira grofvuil cu ta matanan, material manera beton nos ta uza como opvulterrein.”

E ta sigui bisa cu: “Nos ta manera un 10 casnan rond di bisiña akibanda. Nan tur a yega di firma cu nan kier wak e tereno yena. Pasobra e cos aki tabata un buraco di casi 20/25 meter profundo. Awe e ta casi completamente plat. Pues e ta un alivio pa nan, pa nos y cu mañan nan mesun yiunan por haci uzo di dje como un parke of loke sea.”  E ta subraya cu esaki no ta algo cu tin beneficio p’e of su tata, agregando cu: “Mañan ora cu tur cos ta bon drecha, esaki ta bay hisa nan balor di cas tambe etc.” Nos a puntr’e con largo nan ta premira cu lo termina di yena e buraco aki eynan, pa cual e ta contesta mas o menos 1 aña mas.

Disculpa
Sr. Misier a pidi disculpa na e bisiñanan y ta bisa cu no ta su idea cu esaki ta pasando. “Nos no a spera esaki. Nos a bin cu solucion riba gasto di mi mes. Tur cos ta bin for di cartera di Misier y nos no ta haya placa di ningun hende pa laga tira sushi akinan.” El a comenta riba e confrontacion tambe bisando cu e habitantenan a bini den un manera agresivo pa busca problema cu e trahadonan na e dump y keha pa paga e candela. “E no ta cu ami a pega e candela y nos ta lamenta pa e bisiñanan pabao. Mi ta pidi sorry pasobra esaki no tabata mi idea.”

 

 

 

 

 

 

 

 

 

 

 

 

 

 

 

 

 

 

 

 

 

 

 

You May Also Like

love festival.jpg

Love Festival a yuda proteha tortuga y nan neishi riba beach

Demostrando cu hende y bestia por biba den harmonia, organisadornan di Love Festival a ...

Sentencia Stamper.jpg

Castigo pasobra no por a core sabiendo cu tin epilepsia

– Corte Superior a condena Indra Stamper pa 6 luna di prizon condicional, 2 ...

Gobierno a cuminsa traha riba legalisacion di cannabis medicinal

Gobierno ta trahando riba legalisacion di cannabis of marihuana pa uzo medicinal. Premier di ...

Mota Engil: trucknan local mester tin nan papel na ordo

Bon Dia Aruba a sigui riba e asunto di e compania Mota Engil y ...

Problema di bashamento di awa di pos riba caya bou atencion

Un problema cu ta wordo presenta constantemente y cu ta representa un peliger pa ...

2b1e8dc8-bf04-4e6c-b0a6-8383a66999cd.jpg

Prome borchinan di direccion instala den Oranjestad

Minister Otmar Oduber recientemente a haci un inspeccion di algun borchi ubica den nos ...