Vereninging Rijscholen Aruba (VRA) a expresa nan preocupacion y esun di nan studiantenan y candidatonan cu ta pendiente pa pasa nan examennan, tanto teorico como practico pa haya nan rijbewijs.

Presidente di VRA, Sr. Maduro a declara cu e examen pa haya un rijbewijs den pasado y te ainda tin hopi problema cu e servicio. “Nos ta bayendo di Guatemala pa Guatepeor,” el a bisa.

Nan tin comprension cu debi na e Covid tur cos a wordo pega. Esaki a trece hopi inconveniencia pa tur departamento y instancia, y tambe pa e departamento di polis cu ta atende cu rijbewijs. E departamento aki ta genera su propio entrada, pero tin su propio retonan cune, debi cu nan tin poco personal pa realisa e trabou y procesa tur solicitud. Awor mayoria di departamento di gobierno a reactiva bek, pero cada dia e problema aki ta birando grandi, ya cu tin alrededor di 3 mil solicitud cu a drenta via nan e-mail adres di hendenan cu ainda no a haya un contesta.

Servicio

E problema aki ta hayando un dimension mas grandi, ya cu e tardansa aki por bay a costa di e candidato su trabao of esun cu ta buscando trabao. E ta haya cu a yega momento tambe pa nan por bay na e normalidad nobo. Aunke dia 1 di juni e departamento di rijbewijs a habri su portanan pa brinda servicio, tur trabao a wordo acumula for di maart, april, mei y te juni.

E ta un retraso enorme di miles di candidato. Segun Maduro e scolnan di rijbewijs tur dia ta wordo bombardia cu kehonan tocante e servicio di departamento di rijbewijs for di nan clientenan y candidatonan pa examen. VRA ta haci un suplica pa trece un solucion pronto, tanto pa examen electronico como esun practico.

E candidatonan tabata programa pa tal fecha, pero nan no a wordo yama pa informa nan riba un fecha nobo. Nan tin hopi respet pa e trabao cu de departamento di rijbewijs ta realisando cu tiki personal. Pero si mester bin cu un solucion pa mehora e servicio, e no ta gratis. E cliente ta paga 90 florin pa haya servicio, y e servicio mester wordo duna.

E preocupacion mas grandi tin di haci cu e studiantenan cu ta cla pa bay Hulanda y cu nan ta prefera di bay cu nan rijbewijs cla, ya cu na Hulanda ta resulta demasiado costoso. Nan a yega di haci nan solicitud na tempo, pero debi na e Covid, tur cos a wordo posponi.

E dianan ta yegando pa nan mester biaha pa Hulanda y te ainda no a duna nan prioridad. Nan a trece e caso di un hobencita cu a aplica pa dos tipo di rijbewijs. Despues cu nan a insisti, e por a realisa un di nan, pero e otro a keda pendiente. Mientras cu tur dos por a wordo haci riba e mesun dia; y pronto e mester biaha pa Hulanda.

Alternativanan

Tur cos ta indica cu te luna di september lo cuminsa aplica pa solicitud nobo di rijbewijs, debi cu nan mester atende esunnan prome. VRA ta haya cu tin sistema digital nobo cu por wordo usa pa sigui duna servicio. Maduro a trece como ehempel Censo cu via online bo ta haci bo cita pa renoba bo ID of paspoort. E ta haya cu e sistema aki tambe por wordo usa pa departamento di rijbewijs.

Nan ta compronde cu e proceso y sistema aki a wordo entrega na april caba na Cuerpo Policial. Pero ya caba a transcuri dos luna y ainda VRA no ta haya contesta riba ki dia e sistema aki ta wordo introduci, cu sigur lo yuda alivia e peso di trabao pa esun cu ta traha den e departamento di rijbewijs. Ademas nan ta evita aglomeracion di hende.

E asociacion aki a bisa cu nan no kier crea un problema mas grandi y bin cu critica so, sino cu nan kier ta parti di e solucion structural y duradero pa e problema di rijbewijs. E falta di personal den e departamento aki no ta di awor, si no cu e ta biniendo di añanan atras. Un parti di e scolnan di rijbewijs miembro di VRA ta wordo maneha pa ex miembronan di KPA.

P’esey nan a sugeri dicon no ta move e personal di Polis di Bario pa reforsa temporalmente e departamento aki. Asina nan por duna un man pa atende cu tur e solicitud y retraso di solicitud haci via e-mail. Nan a bin cu mas alternativanan cu lo por yuda alivia y trece solucion.

Igualmente Thomas Ruiz, kende ta secretario di VRA, a bisa cu nan a propone solucion pa atende cu examen practico di rijbewijs. Nan no ta haya motibo pa tanto tardansa pa atende cu e situacion aki, ya cu tin protocol cu ta wordo ehecuta pa otro tipo di servicio, como esun di ambulance, cu por wordo ahusta y usa segun e circunstancia particular aki.

E no ta haya un diferencia entre e Covid protocol di VAR pa haci su practica y esun cu Cuerpo Policial (KPA) mes ta usa pa patruya. Nan ta desinfecta e patruya prome cu e dos agente ta sali y ora cu nan ta bin, nan ta desinfecta bek. Pero tambe ambulance, brandweer y Arubus ta usa e protocol aki pa su personal. E rijscholen por haci mesun cos; ya cu si nan ta hacie, dicon e scolnan di rijbewijs no por hacie.

P’esey Ruiz a declara: “Ki diferencia e ta? Ta un agente cu un candidato tin cu core bo examen ruta.” Logicamente nan mester hacie di un manera safe. E no ta comprende tanto tardansa, ya cu nan por scucha di un banda cu minister di Husticia, Andin Bikker tin cu duna aprobacion of DVG. Mientras cu nan ta memey, sin cu por haya un solucion, y sin sa cual ta e diferencia.

Nan tin diferente preocupacion cu for di hopi tempo ta andando y cu te ainda no tur a wordo atendi. Un di nan tin di haci cu e test electronico. E test aki ta wordo haci na diferente idioma, pero e forma con a wordo traduci e preguntanan ta trece bruhamento cerca e persona cu ta haci e test. Bon Dia Aruba lo bin cu mas detaye despues.

Nan ta haya cu minister di Husticia, Andin Bikker mester compromete su mes pa bin cu un solucion. Ya caba diahuebs ultimo nan a tene un reunion cu presencia di nan miembronan cu ta alrededor di 20. Nan ta sinti cu ta falta boluntad di esun cu ta dirigi e departamento aki. Nan ta un asociacion cu tin personeria huridico y nan statuut ta casi cla otro siman.