E Arubiano popular Tommy Croes, conoci entre otro di e banda ‘Cryptus Confessions’ y tambe ‘Grupo di Betico’, a fayece ayera alrededor di 1or di merdia na Aruba. Tommy tabata tin algun tempo caba ta lucha cu su salud y den e ultimo dianan e tabata den cuido intensivo.
Tommy kende ta un di e rumannan di Betico Croes, tabata conoci pa entre otro e cancion popular ‘Paranda Arubiano’ cual e la canta cu ‘Grupo di Betico’. Ademas di cantante, e tabata un docente pa hopi aña y desde ayera por a nota riba rednan social cu e tabata hopi stima tambe pa su ex alumnonan. Banda di e ex alumnonan aki, amigonan y familiarnan tambe a expresa nan palabranan di forsa pa e familiarnan mas cerca.
Pa medio di nan pagina di Facebook, ‘Grupo di Betico’ a bisa: “E voz di nos musica tradicional a bay sosega awe merdia…. Mo Tommy…. Nos ta hopi agradecido na bo cu bo a brinda nos bo tremendo voz. Un voz cu Tata Todopoderoso a regala bo, pero bo a comparti esaki cu bo pueblo y cu hopi den exterior… Nos lo haya bo falta hopi mes. Until we meet again mo Tommy.”
