Minister di Salubridad Publico Alex Schwengle a prefera di abstene su mes di no duna informacion of detaye riba un supuesto suspension of medida disciplinario cu a cay riba un empleado di Departamento di Salubridad Publico. E no a nenga cu e echo aki ta full berdad, pero si e ta berdad, e ta abstene di divulga e tipo di informacion aki via prensa.
Sinembargo e mandatario a declara na e matutino aki cu tin diferente casonan andando, no solamente den departamento di Salubridad Publico sino den cierto departamentonan. Nan ta casonan cu a pasa y cu den nan opinion no ta corecto. P’esey hunto cu Departamento di Recurso Humano (DRH) y a base di leynan vigente nan ta anda cu e procedemento manera cu nan ta.
“Mi no ta divulga niun, specificamente di nada di niun persona”, el a bisa.
E mandatario ta haya cu cualkier cos cu por ta tumando luga den un instancia of departamento di gobierno y particularmente si esaki ta resorta den su departamento, e ta abstene di duna informacion, ya cu esaki ta “cosnan interno”. E ta considera cu esaki ta un derecho cu e trahado tin y e ta respeta esey.
