Segun e resumen di DVG cu cifranan di Covid-19 pa Aruba, por a tuma nota cu e total di casonan activo a baha cu 50 caso, pa keda na un total di 677.
Ademas, DVG a informa cu 78 persona mas a recupera, y tin 29 caso nobo di Covid-19, di cual tur ta residente.
Ayera a realisa un total di 294 test, di cual a haci 216 entre residentenan na hospital.
Tambe a conoce un fayecido mas pa Covid-19, treciendo e total na 27. Condolencia na famia y sernan keri di e fayecido.
Hospital a informa cu tin un total di 43 persona interna. Di esakinan, 10 ta den cuido intensivo y 33 ta isola riba piso general. DVG ta nota cu den transcurso di dianan, e cantidad di caso ta sigui baha, y esaki por continua cu cooperacion y disciplina di pueblo en general.
Mientras tanto, Gobierno a informa cu no lo tin un conferencia di prensa ayera, pa motibo cu no tabatin ningun cambio den e medidanan cu tin implementa actualmente, ni den e maneho pa cu Covid-19.
