E cantidad di victima mortal pa di dengue na Paraguay a aumenta pa 16 e siman aki, dies mas cu shete dia atras, e cartera sanitario a informa.
E director di e departamento di Vigilancia di Salud, Guillermo Sequera, a bisa den un rueda di prensa cu nan ta investiga ademas 89 acta di fayecimento pa determina si nan a muri di dengue.
Sequera a agrega cu ta 4.255 e caso di dengue confirma y 85.000 e notificacion di sospechoso desde luna di januari.
E funcionario a splica cu ta trata di ‘cifranan historico’ y a admiti un aumento di e epidemia actual aki.
77% di casonan ta di e area metropolitano di Asuncion y di departamento Central, e zona cu mas poblacion di e pais, pero Sequera a señala cu a registra un aumento di e notificacion na otro departamentonan.
San Lorenzo y Capiata ta esunnan cu mas notificacion, 5.000 pa siman.
Minister di Salud, Julio Mazzoleni, den e mesun rueda di prensa a bisa cu su ministerio ta reforsa e cuadro sanitario pa destina mas recursonan ‘pa e departamentonan cercano unda ta teniendo un aumento di e notificacion y tambe den e area Capital’.
E cifranan nobo a keda conoci un dia despues cu e Camara di Senador a aproba un declaracion di emergencia sanitario pa dengue na e pais.
Sinembargo, e Ehecutivo ta nenga di emiti e declaracion aki ora el a afirma cu e poblacion tin garantisa e asistencia sanitario cu remedinan y personal.
Hunta Municipal di Asuncion si a haci e declaracion na fin di januari pa un plaso di 90 dia, pa motibo di e aumento di casonan.
