Despues cu Hospital Horacio Oduber (HOH) a compara datonan di final di e di tres ola (8 di april te cu 3 di juli) di coronavirus na Aruba cu esnan di e di cuatro ola (andando), ta resulta cu e porcentahe di hende vacuna cu tabatin mester di hospitalisacion pa coronavirus a aumenta di 10 pa 22 porciento, y den ICU a aumenta di cero na 22 porciento.

Segun un relato di reportero Sharina Henriquez pa e portal noticiero online Ret Karibense, ‘den e di cuatro ola di coronavirus na e isla, HOH tur siman poco poco ta mira mas y mas admision bao hende vacuna’.

Director di HOH, Jacco Vroegop a comenta cu na Aruba ta sucediendo loke tambe ta nota den resto di mundo: poco poco tin menos proteccion di vacuna di coronavirus contra manifestacion serio di e enfermedad.

Mientras tanto, gobierno di Aruba recientemente a cuminsa administra e asina-yama booster-shot na gruponan di riesgo, manera esnan cu ta sufri di malesanan serio (manera cancer) of tin sistema immuun comprometi. Pero tambe na esnan mayor di 60 aña di edad y personal di cuido.

Sinembargo, den su relato, Ret Karibense ta puntra con ta para cu proteccion di e cantidad di ciudadano cu sobrepeso? Mas cu 80 porciento di poblacion di Aruba tin sobrepeso, di cual mita ta asina severo cu tin obesidad.

Instituto di Salubridad Publico, Medio Ambiente y Naturalesa di Hulanda, RIVM, na januari ultimo a conceha pa usa hangua mas largo cerca hende cu obesidad na momento di vacuna, pa asina pasa miho door di vet bao di e cuero. Na Aruba, segun directiva di Salubridad ta usa solamente e hangua di 25mm. Igualmente RIVM a conseha pa duna hende cu hopi sobrepeso e booster-shot, pero na Aruba, ainda e personanan cu sobrepeso of obesidad no ta na turno pa esaki a menos cu nan ta cumpli cu un di e otro criterionan.

Na comienso di e luna aki, HOH a publica un analisis di co-morbilidad di pashent cu a admiti den e hospital durante e di cuatro ola di coronavirus. Esaki ta referi na esnan cu banda di covid tin otro enfermedad tambe. Segun Vroegop, “E linea cora pa resulta den hospital ta obesidad.” Analisis ta mustra cu 80 porciento di pashent hospitalisa pa Covid tabatin sobrepeso. Vroegop ta agrega cu ‘ta parce manera e vacunacion ta protege hende hopi gordo parcialmente so contra admision na hospital’.

A pesar cu obesidad y sobrepeso ta representa un riesgo asina grandi, no tin medida pa purba di controla esaki. Pa motibo di e pandemia cu a cuminsa aña pasa, Gobierno no por a implementa su plan nacional di prevencion, den cual tabata duna hopi atencion na sobrepeso entre e poblacion. Asina mes gobierno a enfoca riba duna informacion na comunidad riba con pa biba mas saludable.

Pero Ret Karibense ta critica cu gobierno di otro banda ta keda duna espacio na industria di fastfood. Desde comienso di e pandemia a habri tres restaurant nobo di fastfood, y tin un di cuatro na caminda. Tur dia por observa rijnan largo di hende para dilanti di e establecimentonan aki. Desde 2018, un investigacion di salubridad ya a destaca cu fastfood ta e cuminda faborito di mayoria di Arubiano cu ta come pafo di cas.

Y asina toch gobierno ta bolbe inicia cu desaroyo di e plan nacional di prevencion di salud. Entre e plan aki ta contempla pa habri un clinica di obesidad den hospital, pa siña hende biba mas saludable. Minister di Salubridad Publico, Dangui Oduber, a comenta cu ta spera di por haci apertura di esaki proximo luna caba.

Potret ilustrativo.

LEAVE A REPLY

Please enter your comment!
Please enter your name here