Despues cu varios fundacion cu ta encarga di rescata animalnan na Aruba a informa tocante un actividad pa stop maltrato y abuso di bestia, diasabra ultimo un cantidad grandi di hende bisti di color blanco pa asisti na e caminata cu a tuma luga den oranan di atardi.

Manera ta conoci, esaki tabata un actividad pa hende no lubida loke a pasa recientemente cu e cacho di nomber “Khaleesi,” cu a muri pa via di maltrato y abuso. Sinembargo, e problema aki ta sigui sucede, caminda a reporta mas casonan di maltrato den e ultimo dianan aki.

Diasabra ultimo, un di e organisadornan di e caminata, Zoey Conijn Berkel di Luna Foundation Aruba Inc., a sigura cu el a keda satisfecho y orguyoso di mira cuanto hende a presenta na e actividad contra abuso di bestia. “E ta un good feeling pa wak cuanto hende a bin.”

No por bisa precies cuanto hende tabat’ey, pero Conijn Berkel a sigura cu nan a logra bende mas cu 800 T-shirt y esey pa nan por ta un indicador – aunke no tur di nan a logra asisti.

Ademas, turistanan tambe tabata presente y e ekipo di e medio di comunicacion Hulandes, “NOS” tambe a bin Aruba pa cubri e evento, “pa mundo por wak cu no ta trata di agresion of abuso solamente, ta trata di un cambio, un cambio pa nos mascotanan y no cachonan so.”

Loke si a hala atencion ta cu niun minister a presenta pa duna nan apoyo na e accion aki, “pero esaki tampoco ta trata di algo politico,” Conijn Berkel a sigura.

El a agrega cu e fundacionnan lo sigui pusha gobierno pa ahusta e ley. “Nan no tin cu skirbi un ley nobo, bo por copy and paste esun di Hulanda; mester tin un cambio den ley, si no nos ta keda draai den circulo,” el a sigura.

Den un articulo cu Bon Dia Aruba a publica dia 5 di april ultimo, Conijn Berkel a trece dilanti cu menasa y agresion contra e doño di Khaleesi a bay mucho leu. “No ta bon. E caminata ta pa calma pueblo y por enfoca directamente riba loke ta pasando cu tin maltrato riba nos isla. Loke a pasa cu Khaleesi no ta un caso solamente, esaki ta tumando luga pa añanan caba, solamente cu loke a sucede cune a bay viral y haya extra atencion.”

Entre esnan presente tambe a logra mira otro fundacionnan, personanan canando cu nan cacho y hasta muchanan cu ta para contra e tipo di accion aki contra nos bestianan.