(EFE) – E marcha di e mamanan cu nacionalidadnan Centro Americano a tuma luga diasabra ultimo na e Zocalo di e capital Mexicano pa exigi husticia y localisa nan yiunan cu a disparce durante nan transito migratorio na Mexico.

E grupo di casi 50 persona, den cual tambe tabatin algun homber, a marcha den e cayanan di Centro Historico di Ciudad di Mexico cu potretnan di nan yiu desaparecido y e banderanan di Guatemala, Honduras y El Salvador.

“Nos tur ta migrante” e muhenan a grita para dilanti di Palacio Nacional, na unda e presidente Andres Manuel Lopez Obrador ta biba y traha.

E grupo cu tabatin potretnan di nan yiu colga na nan nek, e drenta na Mexico entre 1 y 2 di mei via e brug di municipio di Ciudad Hidalgo, Chiapas, na frontera cu Guatemala.

Den nan regreso na Mexico despues di dos aña di pandemia, e mamanan a recore estadonan di Chiapas, Veracruz, Tabasco y e capital pa pidi na autoridadnan Mexicano avancenan tocante e denuncianan cu a presenta pa nan desaparecido.

“Mi yiu scucha, bo mama ta den lucha. Nunca nos a bay, akinan nos ta y akinan nos ta keda”, e mamanan a grita na e Zocalo.

E bishita di e caravana ta coincidi cu e biahe di e presidente Lopez Obrador pa Centro America, na unda el a keda te ayera pa papia tocante migracion cu e otro mandatarionan.

E region ta bibando un fluho migratorio record pa Merca, den cual Oficina di Aduana y Proteccion Fronteriso (CBP) a detecta casi 1,7 miyon indocumenta na frontera cu Mexico den aña fiscal 2021, cu a caba dia 30 di september.

E marcha di e mamanan tambe ta refleha e crisis di personanan desaparecido na Mexico, unda tin casi 100.000 persona no localisa, segun datonan oficial di Gobierno.

 

LEAVE A REPLY

Please enter your comment!
Please enter your name here