Home Regional Caribe: Caricom ta recomenda di clasifica marihuana como substancia controla

Caribe: Caricom ta recomenda di clasifica marihuana como substancia controla

220

(CaribbeanNewsNow) – Caribbean Community (CARICOM) su comision regional encuanto marihuana a recomenda pa kita e clasificacion di marihuana como un droga peligroso den tur legislacion y e reclasificacion como un substancia controla, den nan informe presenta na e reunion di hefenan di gobierno di Caricom na Montego Bay, Jamaica, siman pasa.

E comision a presenta su conclusion y recomendacionnan encuanto e temanan social, economico, di salud y legal alrededor di e uzo di marihuana den Caribe.

“E comision ta kere cu e meta final pa CARICOM mester ta e desmantelamento di prohibicion den su totalidad, y reemplasa esaki cu un cuadro regula estricto, parecido na esun cu tin pa alcohol y tabaco, cu ta substancia dañino, pero cu no ta criminalisa”, e reporte ta bisa.

E comision ta unanime den su opinion cu e actual clasificacion di cannabis/marihuana como un droga peligroso, cu ningun narcotico, mester cambia pa un clasificacion di cannabis como substancia controla. E comision ta haya cu finalmente politica legal encuanto marihuana mester ta di informa, no pa acercamento punitivo, pero pa consideracion di salud publico, cu un perspectiva di derecho humano, husticia social y di desaroyo.

“Un acercamento demasiado limita pa cu reforma legal, incluyendo uno cu ta enfoca solamente riba marihuana medicinal, lo ta contra productivo y limita  pa e metanan di desaroyo di Caribe, manera delinea den e SDG-nan (sustainable development goals) y aproba pa Caricom.

Entre su recomendacionnan e comision ta sugeri retro-actividad pa coregi inhusticia cometi den pasado, manera elimina mencion den registro criminal.

Como un paso preparativo pa haci marihuana un substancia legal, e comision a recomenda e descriminalisacion di e droga pa uzo personal den ambiente priva y pa uzo medicinal.

E informe sin embargo ta mantene e opinion cu e droga mester keda pafo di espacionan publico.

E comision a recomenda cu ley di aduana mester cambia pa facilita importacion y exportacion di cannabis y producto di cannabis, y a sugeri cu actividad comercial cu cannabis mester keda descriminalisa o legalisa pa evita e implicacionnan di legislacion contra labamento di placa y ley contra beneficio procedente di crimen.

Tambe e informe ta nota cu productor y comerciante chikito mester keda inclui den produccion y comercialisacion, cu control adecuado cu ta limita empresa grandi y envolvimento stranhero.