Home Local Nos ta sostene creatividad y artistanan suficientemente?

Nos ta sostene creatividad y artistanan suficientemente?

811

Go Cultura Foundation cu concierto pa recauda fondo diasabra

Go Cultura Foundation ta recaudando fondo por medio di un concierto riba diasabra venidero cu cantantenan local pa asina por sigui sostene talentonan local di diferente disciplina. Nan ta boga alabes sociedad realisa e balor agrega di inverti den industria creativo pa fomenta talento.

Aunke na Aruba e definicion di cultura, mescos e percepcion general riba profesionnan artistico ta limita, tin personanan cu ta scoge pa sigui desaroya nan talento maske esaki no ta lo mas popular pa haci. Sinembargo por mira cu structuralmente no tin un sosten amplio of un infrastructura stabiel pa sostene sector creativo, cual ta conduci na un brain drain of frustracion di artistanan.

Den e rumbo aki un combersacion cu Bon Dia a tene cu Edjean Semeleer a bay. Sr. Semeleer ta un cantante Arubano cual hunto cu otro artistanan di diferente ramo a cuminsa aña pasa cu Go Cultura Foundation, cu tin como meta sostene personanan cu kier eherce un profesion creativo of artistico, por medio di establece lasonan mas estrecho entre e sector aki y sector comercial.

Cultura ta mas cu folklore
Pa celebra e prome aniversario di e fundacion nan ta organisando un concierto riba Freewinds cual tin como meta recauda fondo diasabra venidero pa 7or y mey, unda cantantenan local manera Camilo Bastidas, Jeremy Garcia, Liam Kelly, Stephanie Albertus y Jeanedy Semeleer lo haci nan bos luci hunto cu sr. Semeleer mes.

Aunke lo ta celebrando cu artistanan cu ta cantante pa e fundacion su prome aña, e pensamento primordial cu nan kier promove ta cu cultura no ta solamente encera folklore manera Dera Gay. Ademas cu arte of disciplinanan artistico no solamente ta comedia, teatro y pintura. Sr. Semeleer ta conta nos cu cultura ta encera algo hopi mas amplio, cu repercusionnan basta pisa pa henter comunidad y e identidad cu cada persona den comunidad tin.

E ta e base y identidad di nos comunidad. E ta con nos hendenan ta pensa, inventa, expresa, resolve, celebra y comunica. E ta nos custumbernan, nos dia pa dia, kico nos ta bisti, kico nos ta come, kico nos ta kere aden, nos ritualnan, con nos ta lanta nos yiunan y hopi mas.”

Sector priva ta sostene industria creativo como inversion

Pa por boga pa mas interes y mas desaroyo di talento local di tur disciplina e fundacion ta enfocando riba cera acuerdonan cu sector priva pa crea un tipo di partnership unda sector priva ta inverti den desaroyo di un artista por medio di financia proyectonan a cambio di e fundacion y e artistanan nan colaboracion mutuo cu sector priva.

Di e manera aki e fundacion ta kere cu por bay yuda independisa artistanan por medio di yuda nan ta entrepeneurnan creativo. Segun sr. Semeleer, esaki lo tin su balor agrega mirando e diferente areanan cual por beneficia di un sector creativo mas proactivo, manera salud mental general. “Aunke un industria creativo ta trece su beneficionan economico maske no tin hopi fe den esaki na Aruba, si bo wak cu nos tin un crisis social e ora ey mi ta haya cu sector creativo por hunga un rol hopi importante den formacion social.”

E cantante ta mustra alabes riba e echo cu arte tin un influencia positivo riba desaroyo cognitivo, personal y cada un su sentido di pertenencia. Importante tambe ta empatia, mirando cu creatividad y arte ta desaroya un persona su capacidad pa compronde otro persona y pone su mes den su sapato. “Na Aruba mi ta kere cu nos tin hopi falta di empatia. Aunke nos tin esaki hopi biaha riba Facebook, e ta importante pa walk the talk tambe.”

Exodo di talento

Su urgencia pa sigui desaroya creatividad riba nos isla por medio di e fundacion ta basa riba e sintimento cu artistanan tin ora cu no ta haya e sosten y oportunidad pa sigui crece, cual hopi biaha ta conduci na un decision motiva positivamente of negativamente pa bandona Aruba realisando cu nan mester busca mas oportunidad afo of despues cu nan a pasa den un frustracion continuo.

Asina por a mira cu recien artistanan contemporaneo Alydia Wever y Ryan Oduber a dicidi di bay afo y e pareha a presenta nan ultimo obra na Aruba titula ‘Expresion’. Sr. Semeleer a conta Bon Dia cu e obra aki a pone bira hopi emocional y asina puntra su mes ‘is it worth it?’. Pa e cantante, e obra aki a expresa algo cu cada artista ta expresa den nos comunidad.

E ta manera un grito. Tur e energia, e pasion y e sacrificio cu bo ta hinca den dje. Pero ora mi bay bek na e pregunta, mi ta kere esunnan den e grupo aki ta compronde e importancia di esaki y si no tuma iniciativa y si nos stop di inspira y expone talento, mas atras nos lo bay.”

Pa yuda cu e causa di e fundacion por cumpra un ticket pa e show riba 14 di juli a costo di 50 florin, na Fantastic Gardens, Taste my Aruba (den edificio di Cosecha) of oficina di Go Cultura Foundation den Emanstraat 24.