Na ocasion di e actual bishita di famia Real, abogado y activista Anouk Balentina a manda un ‘carta abierta’ na Rey Willem Alexander, cu a sali publica (na Hulandes) riba e portal koninkrijksrelaties.nu. E titulo yamativo ta bisa, den traduccion liber: “Autonomia como pretexto pa violacion di derecho humano? Unda e garantia a keda?”
E carta ta tuma accion contra e forma, segun e activista, con gobierno ta informa e bishita real di un forma conveniente pa gobierno, unda no ta mustra e realidad di comunidad di Aruba manera e ta. Como ehemplo ta elabora ampliamente riba e caso di e dump di Parkietenbos, cu recientemente ta cera, pero unda ainda casi diariamente tin candela cu ta basha huma toxico riba e vecindario.
Tambe Balentina ta mustra riba e hecho cu, segun su opinion, e cercania di e sero di sushi ta haci cu aeropuerto no por cumpli cu normanan internacional di seguridad di aviacion di FAA/ICAO, loke segun Balentina “lo mester por interesa Su Mahestad, siendo piloto”. E ta denuncia tambe cu gobierno Hulandes lo a suministra fondo durante hopi aña pa yuda resolve e problema, pero cu “nos politiconan a gasta na otro asunto o gasta cu empresa di amigo cu supuestamente lo por resolve e problema. E situacion aki no por sigui asina.”
Un di e elementonan referi den e carta ta trata e ausencia di legislacion ambiental. Den esaki e activista no a exagera, pasobra esey ta un falta grandi den e obligacionnan gubernamental. E ta denuncia tambe e hecho cu gobierno di Aruba lo ta nenga redondamente di haci un investigacion encuanto efectonan riba salud di e situacion y no ta laga haci tampoco medicion obhetivo di e calidad di aire den e area. No ta haci tampoco ningun investigacion den subsuelo, mientras pa añanan largo ta conoci cu tabata dera asbest y sustancianan radioactivo den e sero.
Punto cardinal cu Balentina ta trece dilanti cu no tin segun su vision, garantia pa e ciudadano Arubano na nivel di Reino, unda e ta referi na e papel di garante cu gobierno di Reino tin , manera describi den Statuut. E ta referi concretamente na articulo 43, inciso 2, unda ta describi e asunto di garantia di parti di gobierno di Reino (“Garantia di e derechonan, libertadnan, seguridad huridico y gobernacion adecuado (deugdelijkheid van stuur) ta asunto di Reino”; red.). E ciudadano Arubano segun e activista tin, manera cualkier otro ciudadano di Reino, derecho di garantia di nan derecho humano fundamental encuanto salud, bida sin estorbo y un medio ambiente limpi.
Punto central den su denuncia ta cu demasiado facil ta conclui cu ta trata aki di asunto local, y cu ya a pasa e fase ey, cu ta keda referi na e supuesto ‘autonomia’ te cu ta yega na viola derecho humano di e ciudadano di Aruba, como ciudadano di Reino. Por lo tanto su yamado publico na Su Mahestad, pa tuma nota di e situacion, y ta gradici di antemano pa cualkier intervencion cu e Rey por haci pa e habitantenan di Parkietenbos por bolbe na un bida normal.
Potret di archivo.
