Mirando e situacion precario na KIA, unda den un periodo di 1 luna 2 preso a logra huy, Minister di Husticia ta dirigiendo un carta na Hulanda cu urgencia pa asina informa gobierno di Reino riba e importancia pa Aruba yega na un plan pa un instituto di coreccion nobo.

Diamars atardi Minister di Husticia, Andin Bikker (POR) a tene un briefing cu tur instancia concerni cu ta KPA, Veiligheids dienst Aruba, Cuerpo Especial Arubano, KIA y Ministerio Publico unda a duna informacion riba e ultimo desaroyo di e persona Martina cu a huy di KIA diadomingo mainta.

Segun Minister di Husticia, for di momento cu el a asumi responsabilidad como minister, el a bin ta bisa cu e instituto KIA ta hopi deteriora. Despues di varios intento pa haya conseho di CFT pa traha un KIA nobo, awor a dicidi di no warda mas pero bin cu Request for Expression of Interest pa bay mercado y mira si tin interes pa yega na un instituto nobo. Diaranson mainta Minister Bikker ta bay reunion di Conseho di Minister pa asina traha un carta pa informa Hulanda riba e urgencia pa bin cu un prizon nobo.

Tempo di e gobierno anterior tambe tabatin caso di persona cu a huy y no a haya nan mas y awor ta spera cu pronto por haya Martina. Pero e reto ta keda cu e instituto ta hopi deteriora y los di esey tin scarsedad di personal unda hopi personal ta traha dianan nan largo. Riba e scarsedad di personal, Minister Bikker ta bay haci un apelacion na Ministerraad pa purba haya mas hende pa asina yuda y evita cu tipo di escapenan asina ta pasa.

Por lo pronto, lo bay trata di reenforsa e puntonan debil cu por tin, y pa medio di camara y drones, yega na mas vigilancia cu ta bay implementa den e proximo simannan. Tambe ta bay tin cierto restriccion pa e detenidonan, pa evita cu esaki sigui pasa. E ta keda un echo cu un instituto cu a keda diseña decada nan pasa ya no ta cumpli cu e exigencianan di aña 2019 bay ariba.

E reto ta keda e aspecto financiero cu e gobierno actual a hereda. Tin hopi gana di ehecuta diferente proyecto, pero pa loke ta e prizon nobo, no por yega traha e instituto facil pasobra tin un reto financiero, segun e mandatario. Ta spera cu otro siman e Request for Expression of Interest lo ser publica y via e reaccionnan por bay mas pronto cu ta posibel pone e prome bloki pa e instituto di coreccion nobo.

 

LEAVE A REPLY

Please enter your comment!
Please enter your name here