ORANJESTAD – Aunke nos tin un generacion cu ta enfocando mas riba arte visual y digital, directora di Cas di Cultura, sra. Vicky Arens ta kere cu Cas di Cultura tin su derecho di existencia. E ta haya cu ainda den nos comunidad ta existi un aceptacion pa loke ta arte di tarima.
El a bisa cu Cas di Cultura tin un capacidad di 572 hende den e sala grandi y 100 den e sala chikito of sala di exposicion. Alrededor di 50 mil bishitante pa aña den un promedio di 200 actividad ta bishita Cas di Cultura. “E 50 mil bishitante ta mustra nos cu nos tin derecho di existi.” Tin grupo cu anualmente ta ripiti nan presentacion haciendo uzo di e facilidad di nos Cas di Cultura. Nan mester di e infrastructura aki pa mustra nan arte of avenida riba cual nan por mustra locual nan ta trahando riba dje. “Sino na unda?…Bo mester un teatro nacional”, el a declara na Bon Dia Aruba.
Un teatro unico
E ta haya cu ta importante pa sa cu Cas di Cultura ta e unico “podium theater”, esey kiermen un teatro den estilo cu bo ta wak tur loke ta pasa den un leishi den Caribe Hulandes di e tipo aki tambe. “E ta un tesoro pa nos salvaguardia”, el a bisa.
El a trece dilanti cu nos tin un ehempel lastimamente di un teatro di casi e mesun estilo na Corsou pero cu actualmente ta den mal estado y deteriora, y no ta habri pa varios decada caba. E mesun arkitecto a construi ambos teatro, pero esun di Corsou ta deteriora.
P’esey ta importante pa e directiva di un fundacion manera Cas di Cultura percura pa haci mantencion regularmente di e luga semper. For di 1958 kiermen fei su inicio, Cas di Cultura ta un fundacion cu a wordo forma cu miembronan di varios organisacion den cual cada un tin un representacion. Cada un di e organisacion aki a wak e necesidad pa nos isla tin un podium pa expone nan arte escenico y arte di actuacion. E fundacion ta full doño y responsabel pa cas di cultura aunke nan ta ricibi subsidio di salario for di Gobierno pa nan por funciona. Pero e ta un parti, mientras cu e otro parti nan mes tin cu percura pa nan haya esey.
Auto sostenibel
Sra. Arens a bisa cu dor cu nan tin cu mantene un prijs social, aunke tin biaha e no ta resulta mucho barata pa e gruponan cultural, nan entrada no ta suficiente pa nan crea un fondo pa spaar y yega na renobacionnan grandi.
E parti di ta auto sostenibel, di Cas di Cultura no ta facil, aunke segun Sra. Arens nan ta buscando manera pa yega na e punto di genera nan propio fondo. Pero e no ta algo ainda realistico, ya cu esaki ta nifica di otro banda cobra huur mas halto y nos base cultural kiermen nos fundacionnan cultural y gruponan di baile no ta bin Cas di Cultura pa huur mas. E ta kere cu Cas di Cultura mester keda accesibel y p’esey e subsidio ta necesario.
Master Plan
Nan ta trahando un Master Plan pa Cas di Cultura, y nan tin pensa y skirbi caba pa yega na mas recurso comun den mundo di teatro mundialmente. Pero, e mester bisa “un gran pero”, ya cu esaki no ta facil. Durante un biahe cu el a realisa recientemente na Hulanda el a sostene diferente reunion cu directornan di teatro, y nan teatronan no ta auto sostenibel.
Sin embargo nan ta mira e importancia di nan teatro cu nan percura pa canalisa recurso y asina realisa mantencion di nan teatronan. E ta admiti cu e mentalidad aki ta lanta cierto envidia cerca dje. Ya cu nos tin un teatro so, y nos mester percura pa salvaguardia. E ta reconoce cu nos pais ta chikito y ta dificil pa 110 mil hende sostene full un teatro nacional, pero na Hulanda tin teatro situa den municipionan cu ta haya sosten di comunidad ya cu nan ta unico den nan bisindario. “No por culpa niun hende cu e sistema ta asina akinan paso nos ta gewoon un pais chikito”, el a bisa.
Actividad
E ta haya cu nos Casa di Cultura a pesar di e inversion cu ta rekeri pa mehora su estado, a lo menos nos ta den un punto cu ainda nos comunidad cu su apoyo por salvaguardia esey. Pero si nos warda mas ta bay tin cosnan no desea. Ya caba tin hendenan cu ta criticando di e situacion di stoelnan, tambe di e murayanan. Pues e ta kere cu e situacion di Cas di Cultura no mag di bira pio.
Actualmente algun trabou di drechamento ta tumando luga, y nan a cuminsa verf e fachada pa pinta e logo nobo. E ta un momento pa aporta, ya cu actualmente tin e partner corecto pa mehora e condicion di Cas di Cultura.
P’esey dia 24 di october nan ta organisando un gran actividad di recaudacion di fondo hunto cu diferente amigonan y artistanan di Cas di Cultura. Igualmente nan lo bay haci colecta riba caya pa asina tur hende lo por aporta.
Sra. Arens a bisa cu lo tin un anochi tremendo cu apoyo di nos artistanan dia 24 di october. E ta 100 dollar of 300 florin pa dos ticket y bo lo haya un wine and cheese y e publico lo disfruta di un anochi espectacular caminda nan lo contempla e balor di nos teatro nacional.
