(NLTimes) – Agencia Espacial Europeo (ESA na Ingles) a bisa cu 998 ciudadano Hulandes a entrega un aplicacion pa bira un astronauta pa e agencia.
Hulanda a keda na di 7 luga entre 25 pais pa e mayor cantidad di aplicacion den e proceso di seleccion, cu mas di 22 mil aplicacion ricibi total.
ESA a bisa cu 300 muhe Hulandes a aplica pa e posicion, e prome yamada di e agencia den 11 aña pa esnan cu kier bira astronauta. Esaki ta pone Hulanda na number 5 riba e lista di paisnan cu e mayor cantidad di aplicante femenino. Francia a keda na prome luga tanto pa mayor cantidad di aplicacion como pa mayor cantidad di aplicante femenino.
Hulanda tambe tabata empata na di cinco luga pa mayor cantidad di aplicante cu un discapacidad. Diestres aspirante pa astronauta Hulandes a aplica pa un vacatura recien estableci pa un astronauta cu limitacion fisico.
“Ta anticipa cu e candidato exitoso lo traha cu ESA pa determina e adaptacionnan necesario pa un astronauta asina por sirbi como miembro profesional di tripulacion riba un futuro mision espacial”, ESA a declara.
E periodo inicial pa entrega e documentonan necesario pa aplicacion a keda completa dia 18 di juni ultimo. E proximo proceso di seleccion di astronauta di ESA ta consisti di seis etapa clave. Den e siguiente ronda, lo evalua tur aplicante a base di e documentonan cu nan a entrega. Un anuncio mundial riba e astronautanan selecta lo tuma luga na fin di 2022.
“Candidatonan lo wordo notifica na final di cada etapa si nan aplicacion tabata exitoso pa progresa pa e siguiente etapa. Sinembargo, pasenshi ta un virtud pasobra henter e proceso di seleccion lo dura un aña y mey”, ESA a bisa.
Den un yamada abierto pa aplicacionnan pa astronauta na 2008, ESA a ricibi 8,413 aplicacion.
Riba e potret di AP por mira astronauta di ESA, Thomas Pesquet di Francia, na april di 2021.
