Caso Ibis bon pa reflexiona? Pero ken ta haci esey?

E ‘shockwave’ di e condena di e ex-ministro encarga cu labor no a desaparece completamente ainda, y nos por lesa o scucha aki aya comentario riba esaki. Nos prome mandatario tambe a dedica atencion na e tema, loke ta bon, igualmente e lider maximo di e partido actualmente den oposicion. Sinembargo, nos tin nos propio pensamento y preocupacion cu e tema aki, si en berdad nos ta bay mira accion pronto.

Nos prome ministro a bisa entre otro cu e caso aki ta un pagina scur den nos historia, y cu esey nos por ta di acuerdo. Pero mester corda si cu e resto di e buki di nos historia no ta consisti di pagina blanco y virgen; nos tin mas pagina scur. Pero no tene miedo, awe nos no ta bay coba den pasado, ban wak futuro. Den esey nos a cuminsa cu e asunto di e ley riba financiamento di partido politico. Nos prome ministro tambe a declara cu e ta kere cu awor si nos ta bay haya e ley… Bon noticia, toch? Nos no ta convenci, cu tur respet. Kico ta e caso? Mientras cu prome ministro ta bisa cu e ta kere cu prome cu e periodo di gobernacion aki caba, nos tin e ley aproba. Ta zona bon, toch? Of no? E ta parce un promesa realisable, pero nos pregunta ta pakico mester warda asina hopi cu e ley? Si nos a comprende bon di un di e politiconan di e partido grandi den coalicion cu ta dunando su aporte na e realisacion di e proyecto, cu nan por keda cla den cuestion di algun luna. Claro cu despues e ley lo mester cana su caminda normal ainda, hayando conseho di parti di Raad van Advies, etc. Pakico anto ta pinta e perspectiva cu e por keda introduci na 2021?

Nos mester corda cu campaña electoral ta cuminsa prome cu fin di 2020, y recaudacion di fondo ta cuminsa hasta prome cu esey. Si por ehemplo e ley keda cla te den 2021, ta bira dificil pa e cuadro legal aki sirbi pa supervisa e campaña electoral di 2021. A pensa riba esaki? O talbes ta net esey ta e proposito? Nos no kier pensa asina negativo, pero e ora mester duna un bon motibo pa no trata e ley aki mas pronto posibel y cuminsa sigura nos como ciudadano cu pa proximo eleccion, tambe den caso cu e cay poco tempran, loke nos no ta anticipa, nos tin un cuadro di supervision cu por cuminsa yuda kita e cancer aki di e mal matrimonio entre politica y comercio.

Y ya cu ta trahando riba e asunto di crea un cuadro di supervision pa politica, ta bira tempo pa aproba e asina yama Boek 2 di nos Codigo Civil, cu ta ‘staciona’ pa basta tempo caba, mientras e obra grandi aki ta pega riba futilidad politico, cu e consecuencia cu e mas di 800 cambio grandi y chikito cu e ley nobo ta contempla, riba tur sorto di tereno, no por bira efectivo. Pakico nunca nos ta tende nos politiconan, specialmente nos legisladornan, papia di e tema aki? Cuanto excusa mas nos mester tende pa nan no haci nan trabao pa cual ta paga nan? Punto importante ta cu e Codigo Civil nobo ta contene tambe regla nobo pa fundacion, y otro forma di persona huridico, cu ta haci posible un supervision hopi mas efectivo. Pa hopi aña caba e partidonan politico, y politico individual, a busca nan refugio den fundacion unda ta colecta placa pa campaña, cu riba su mes no ta algo repudiable. Pero e ora mester tin un supervision adecua riba e organismonan aki. Hustamente e caso Ibis a siña nos cu hopi cos indebido por pasa den y rond di un fundacion asina, si no tin control adecua riba nan. Si nos politiconan kier mustra seriedad, laga nan dedica mas tempo na e cosnan aki, envez di cana rond y prepara pa bay e siguiente encuentro na nivel di Reino o region. Nos no mester bay leu pa ilustra kico nos ta bisa: dos luna di aña a bay caba, y kico parlamento a entrega na legislacion den e dos lunanan ey?

Di otro banda, nos a tuma nota di e ideanan cu e lider di e partido grandi den oposicion a trece dilanti. Pa distancia bo mes, como partido, di e lasonan dañino cu comercio, lo mester tin otro fuente di entrada pa hiba campaña. Un di e posibilidadnan ta e reclutamento di mas tanto miembro posible, pa yuda e partido cu un base di contribucion. Esey ta en berdad e manera con e partidonan na Hulanda ta opera, banda di e hecho cu nan ta haya subsidio di gobierno pa nan financia nan organisacion. Talbes esaki ta ‘one bridge too far’ pero ta importante si cu mester cuminsa un debate sano na nivel nacional di con nos por ancra den ley loke nos como pueblo ta desea di tin como sistema di supervision, cu ta pa proteccion di ciudadano y politico. Banda di esaki tin e otro iniciativanan, priminti caba, pa yega na bon gobernacion. Nan tambe ta warda te 2021?

 

You May Also Like

Frontera cera ta bon?

Contrario na e otro islanan, cu ta laga e barconan cu fruta y berdura ...

E berdad tocante mercado laboral

E proximo fin di siman tin un evento grandi dedica na e persona desemplea, ...

Nos ta cla pa implementa e-government?

Nos a haya e noticia recientemente cu gobierno ta trahando duro pa analisa y ...

Si medida ta inevitabel…

Tuma nan mas pronto posibel Cu e situacion financiero di gobierno ta sumamente dificil, ...

Formacion di gobierno ta birando comico

Sinterklaas ta cay tempran e aña aki… Realmente formacion di gobierno involuntariamente ta birando ...

Partido den gobierno no a haci falta den debate

Bon oportunidad pa duna informacion E debate di/pa ‘milennials’ no a bira un evento ...