Ministerio Publico (OM) ta informa cu e caso di intento y asesinato cu veneno di djaca den orange juice ta bin dilanti corte awe den pro forma. E no lo wordo trata den su contenido ainda y sospechoso lo presenta dilanti hues acusa di asesinato di un persona y intento di asesinato di otro dos miembro di famia.
E tratamento di e caso pro forma aki awe den corte lo ta tras di porta cera relaciona cu e edad di e sospechoso. Segun nos a compronde ta trata di un mucha di 15 aña cual ta e nieta di un di e miembronan di e famia cu a fayece pa medio di e veneno.
Caso
Diamars 23 di november 2016, rond di 10’or di anochi, un famia a bay cumpra un orange juice pa nan bebe na cas. Tur e 5 personanan na e cas tanto hende homber y muhe a bebe for di e juice aki. Algun di nan a bira malo y transporta cu urgencia pa hospital. Recherche a presenta na e supermarket Kinppo Foodcenter situa na Cura Cabay caminda cu e famia a cumpra e juice. Departamento forensico di Cuerpo Policial tambe a presenta y a confisca e juice pa investigacion pa loke ta e likido aden. E investigacion tabata pa saca afo kico tabata tin den e contenido. Recherchenan a mira henter e video di grabacion di e supermarket pa wak ki ora e personanan a cumpra e juice.
Segun OM, dos miembro di e famia a bira malo despues di a bebe e juice. E señora cu a fayece tabata hopi grave pero e otro hoben no. Bon Dia Aruba a bishita Gerencia di Kinppo Supermarket e tempo ey kende a bisa cu ya caba a test algun di e juicenan di e mesun marca anto no a haya nada straño.
