Manera cu Bon Dia Aruba a informa, e compania di telecomunicacion MIO tin te cu 30 di juni pa paga su debe di dos aña atras, cual ta suma na mas cu 14 miyon florin. Gobierno no a ricibi nada concreto ainda y e compania mes no ta dunando señal cu lo cumpli cu esaki tampoco.
Un decreto a wordo firma cu MIO tin te cu 30 di juni pa por cumpli cu loke ta nan debe. Pa 1 di juli e licencia pa opera lo wordo hala aden si no cumpli. “Nan tin te dia 30 di juni, mi ta keda cu speransa”, minister di Asuntonan Economico Richard Arends ta contesta Bon Dia. E mandatario ta bisa cu nan a coresponde cu e compania. Sr. Arends ta splica cu loke cu nan debe ta hancra den ley y gobierno no por desvia di esaki. “E ta status quo, tabata tin algun corespondencia pero nada concreto cu lo por yega na un solucion satisfactorio.”
Bon Dia Aruba a tuma contacto cu MIO pero a haya manera contesta cu e doño ta actualmente den exterior pues no por duna ningun informacion of comentario ainda. E compania ta bisa cu manera cu informacion ta disponibel nan lo informa esaki. Minister Arends a bisa cu e leynan di telecomunicacion ta hopi ‘straight forward’. Ta dies miyon florin mester paga pa dies aña y no por wordo fragmenta pa haya un licencia pa tres aña of un aña etc. Esaki ta conta sea bo ta un compania mediano, grandi of chikito.
