Alrededor di 1:10 diamars merdia un homber arma a drenta un cas na Wayaca di un famia Chines y despues di un tiramento, e señora di e cas a fayece. Su pareha a sali herida. E sospechoso a huy y despues polis a confirma cu e tambe ta herida.
Den media a sali hopi lihe cu tabata trata di un atraco arma sinembargo fiscal mayor den un conferencia di prensa ayera nochi no a confirma esaki. Minister di Husticia Arthur Dowers tambe tabata presente y ora Bon Dia Aruba a puntra si ta trata di un atraco of no, y si e famia tabatin cos di balor den nan cas, e mandatario tambe ta aclaria cu esaki no ta cla ainda y mester sali for di e investigacion.
Momento cu e edicion aki a cera (00:00) polis ainda no tabatin bista riba e sospechoso. For di comienso tabatin mas o menos 50 polis riba e caso aki. Husticia a forma un team special, asina alto comisario Dolfi Richardson a bisa ayera nochi durante e conferencia di prensa unda e mando halto di e cadena di husticia a presenta. Pa entre otro mustra cu nan ta pisa riba e caso aki y kier haci todo pa todo pa gara e sospechoso. Tin hopi speculacion riba e identidad di e sospechoso, cu ta trata di un Venezolano sea un Latino. Hopi hende ta pone esaki tambe den contexto di e situacion na Venezuela y e echo cu tin hopi Venezolano biniendo Aruba, entre nan tambe cu intencion malo.
Sinembargo husticia te awor no por bisa nada di su identidad. Riba pregunta di Bon Dia si tin mas sospechoso envolvi, minister Dowers ta contesta cu te awor nan ta asumi cu ta trata solamente di un persona cu nan ta buscando.
Bisiñanan preocupa
Bon Dia Aruba tambe a bay e caya concerni na Wayaca y a papia cu bisiñanan. Nan ta splica cu semper e bario tabata hopi trankil anto cu esaki ta berdaderamente un sorpresa pa nan. E habitantenan ta comparti nan preocupacion contemplando awor di cuminsa inverti den camara di siguridad pa nan hogar.
”Mi no ta kere nan tabata tin camara, hopi di nos no tin camara di siguridad den e bario aki. Esaki ta un bario hopi trankil y hopi dushi pa biba. Prome biaha mi ta experiencia algo asina,” un habitante a bisa Bon Dia Aruba agregando cu e victimanan, di nacionalidad Chines, ta hendenan hopi keto y ta lamentabel locual a pasa cu nan.
E sospechoso a bandona e sitio den un auto Honda color blanco, A-843 cual a wordo haya net patras veld di Sportboys na Angochi caminda un investigacion tambe a sigui tuma luga. “E prome cos cu nos ta haci ora a haya un auto asina ki, e spoor ta hopi importante pa nos. Kiermen e team forensico ta bay e sitio anto ora nan keda cla, nos por duna un relato,” sr. Lito Laclé ta bisa agregando ayera atardi cu ta mucho trempan ainda pa tin un conclusion na kico por a pasa en realidad eynan. A start un buskeda completo, debi cu habitantenan a mira dos pa 3 persona sospechoso den un pickup dobel cabina. Polis a topa cu un pickup parecido na esaki y a duna e chauffeur un señal pa para, pero no kier a para y a start un persecucion cu a caba te na sero di conchi, pero no tabata e sospechosonan.
No por a confirma si algo a wordo horta na e cas na Wayaca pasobra segun sr. Lacle, un persona a fayece y e otro a caba di sali for di hospital kiermen ”E investigacion mester cana su caminda un rato” y no tin ningun otro testigo. Tin un helicopter di Kustwacht di Curaçao cu a yuda den e buskeda di e sospechoso. Manera menciona e ta herida y ta sangrando pero no por a confirma ki tipo di herida e por tin y con esaki por a wordo causa.
