Minister di Husticia Arthur Dowers conhuntamente cu alto comisario Dolfi Richardson a bisa riba preguntanan di Bon Dia Aruba cu berdad e casonan di atracoanan arma ta aumentando.
Mester remarca si cu esaki ta trata e uzo di arma en general, pues ta trata di arma di candela pero tambe arma blanco. Esaki segun nan mester wordo analisa mas profundo pa wak si realmente tin mas y mas atraconan cu arma di candela tumando luga na Aruba.
Bon Dia Aruba a haci e preguntanan aki den cuadro di e caso na Wayaca. Mester bisa si cu te ainda no tin un confirmacion cu den e caso aki ta trata realmente di un atraco cu arma di candela. Te awor husticia ta papiando di un tiramento.
Nos a puntra e minister y alto comisario dicon no tin e cifranan disponibel. “Mi no sa nan awor for di mi cabes”, asina minister Dowers ta contesta. “Pero nos tin nan.” Alto comisario Richardson ta bisa cu mester ta cauteloso cu cifranan si. Pasobra nan por wordo poni den contexto malo. Sinembargo nan lo haci esfuerso awor pa duna mas detayenan riba e cantidad di atraconan arma.
