15caso wayaca (JO) (1).JPG

Den cuadro cu situacion hopi lamentabel den caso di tiramento mortal na Wayaca diamars merdia, segun Ministerio Publico a confirma Bon Dia Aruba, den nan punto di bista e sospechoso ta na Aruba ainda y di nan parti no por specifica ki direccion e por a bay y si ta herida di bala e la ricibi of algo otro.  Polis tin sospechoso den bista pero no por papia nada ainda pa no stroba investigacion. E persona a gewoon yega habri porta di cura y no a yega cara tapa tampoco dus kisas e tabata conoci di e famia, algo cu no ta confirma pa polis of Ministerio Publico ainda.

Ta sospecha cu no ta trata di atraco sino algo otro y ta pa e motibo aki investigacion profundo ta continua.
 

”Ta suplica e publico pa sigui vigilante y si bo nota algo sospechoso, raro of cu no ta klop, meld esey mesora na Polis. E adelantonan cu a wordo haci te awor tabata grandemente danki na tipnan valioso di ciudadanonan y nos ta spera cu hendenan lo sigui yuda nos pa gara e persona of personanan responsabel pa e acto teribel aki,” vocero di Ministerio Publico sra. Ann Angela ta bisa. Sra. Angela ta pone enfasis riba e hecho cu e sospechoso ta herida, kiermen hendenan mester keda atento riba esey. E curpa di e victima ta den beslag pa asina un patologo cu ta bay bini for di Curaçao haci e autopsia riba e curpa dialuna 19 di september. Ministerio Publico no por confirma si e otro victima, esta e casa cu a wordo herida, a haya herida di bala of algo otro tampoco.
 

Ningun confirmacion di pertenencia horta
Vocero di Cuerpo Policial, sr. Lito Lacle ta bisa cu e sospechoso cu nan ta buscando, (entre 35 pa 40 aña di edad, 1.78m haltura) cual ainda ta uno y no tin indicacion cu tin mas sospechoso, ta papia papiamento y e por tin un estilo ‘Guajiro’ unda cu su wowonan lo ta mustra poco Chines.  Bon Dia Aruba a puntra sr. Lacle si polis por a confirma finalmente si tabata tin pertenencia di balor den e cas anto si algo a wordo horta pa locual ainda nada por wordo confirma pa polis of Ministerio Publico ainda.

 

Sra. Shasha tabata doño di un bar/restaurant

E victima Sra. Shui K Fong Fan, miho conoci como Shasha, a naci na Canton, China 18 di Juli 1951. Shasha tabata doño di un Bar/Restaurant na Noord yama Sha Sha Oasis Bar & Restaurant unda cu Bon Dia Aruba a bishita y papia cu un empleado. Empleado di e luga ta conta Bon Dia Aruba cu nunca nan a haya ningun problema den e negoshi, ningun intento di atraco den pasado y cu e crimen aki ta algo hopi shocking anto inespera. Empleado mes no por a comunica cu e otro persona  cu a sali herida, esta e casa di sra. Shasha pa motibo cu su telefon ta paga desde e incidente. E no tabata sa di e paradero di e persona y a puntra Bon Dia Aruba si e persona berdad a sali for di hospital y si e tabata oke. Bon Dia Aruba a acudi na polis y Ministerio Publico pa locual ta detayenan di e paradero di e persona herida pa locual Ministerio Publico a contesta ”E lo a sali for di hospital pasobra e no mester keda mas.”
 
Camara no ta suficiente
Segun vocero di Polis sr. Lacle, tin algun imagen di video cu ta bay wordo revisa unda kisas por a ripara algo. Habitantenan den e caya na Wayaca ta splica Bon Dia Aruba cu hopi di nan no tin sistema di camara den e bario pero cu ta bay haci esey y te hasta mas mirando e situacion actual di crimen na Aruba. Segun sr. John Larmonie di departamento di prevencion di crimen,  un camara cu sistema di alarma ta hopi bon pero esaki di su mes no ta suficiente.
”Camara cu alarma ta bon pa yuda preveni y den caso di investigacion pero pa acapara e miedo di wordo ataca na cas, bo mester bay over na hero y ‘verhard’ bo cas. Nan no mag por yega drenta.” sr. Larmonie ta bisa agregando cu bo mester cuminsa cu bo cura prome. Al menos esun cu por haci e y tin e placa pe awor pa cuminsa pone porta y bentana di bon calidad y fuerte. ”Tanto bal bo pone un porta di 10.000 dollar anto e no ta bon na lock, esaki tambe ta bon importante. Si bo tin miedo pa wordo ataca na cas bo mester concentra prome riba ‘Fysieke Beveiliging’, ” sr. Larmonie ta bisa. Segun sr. Larmonie, si bo zorg hasta pa tin un of mas cacho brabo, esaki tambe seguramente ta un punto cu ta yuda pa hende no wordo inspira pa drenta bo cas.
 

Buscamento di arma pa defensa propio
Algo cu kisas no tur hende ta vocifera, pero algun comentario caba a surgi riba rednan social ta e tema di defensa propio y te hasta pa cuminsa carga cu arma na cas. ”Mi ta compronde e sentimento di siguridad, pero hopi biaha mi ta bisa hende si bo tin cu bay coy un arma ta pasobra cos a bay for di man. Si bo practica prevencion na un manera profesional y corecto cu yudansa di profesional, e ta evita situacion unda cu bo mester pasa man pa arma,” sr. Larmonie ta bisa.
Pa cumpra arma ilegal riba caya, bo ta contribuyendo na criminalidad y te hasta por topa cu arma cu ta daña y ta explota den bo man. ”Bo no sa di unda el a bin, e arma por a mata diferente hende y si nan haya bo cu e arma di candela ey abo ta haya e cargonan. E ta un mundo di problema cu bo lo hinca bo mes aden pa pensa riba busca un arma. Nos tin cu mehora riba metodonan di siguridad convencional prome cu pensa di bay over na esunnan mas extremo.”

Evalua bo risico
Hopi hende ta pensa cu aunke cu bo haci tur esaki bo ta wordo ataca, pero segun sr. Larmonie, mayoria biaha criminalnan no ta gusta traha duro, nan ta gusta eligi ‘easy targets’. Ora nan wak cu e situacion ta facil nan ta bin pa bo y asina e situacion ta bira mas dificil cu e chens pa wordo gara of herida ta mas grandi, nan ta prefera busca otro ‘target.’ ”Si bo sa cu bo ta un persona cu dor di bo trabao y circunstancianan social tin risico mas grandi, tuma mas medida di siguridad. Tin cierto negociante grandi mi ta bisa nan pa no djis tuma medida di precausion na bo negoshi so, haci e na cas tambe. Si bo ta un comerciante grandi, bo lo mester henter un plan di siguridad personal pa bo famia, e ta fastioso pero situacion ta birando dificil,” sr. Larmonie a comenta.