Awe mainta Corte di Aruba (GEA) a atende cu dos caso di abuso sexual; un di e casonan ta trata un menor di edad di 14 aña.
For di Ministerio Publico nos a ricibi informacion cu Hues a condena e homber fam T. cu 12 luna di prison pa abusa sexualmente di un persona menor di edad. Den e caso aki, Fiscal a exigi pa 12 luna di cual 4 condicional. Segun e homber T. cu na momento di abuso tabata tin 26 aña di edad, e sex cu e victima tabata voluntario ja cu nan tabata tin un relacion y hasta a pone cu victima a keda na estado. Hues no a kere e declaracionnan aki despues di a skucha e testigonan. Hues no ta wak niun caminda cu aki tabata trata di algo voluntario y/of cu nan tabata tin un relacion amoroso sino mas bien cu e homber T. a abusa di e confiansa di e mucha.
Den un otro caso cu a keda atendi awe mainta, Hues a dicidi cu no tin suficiente prueba legal y a declara e sospechoso liber. E caso aki lo a sosode na porta di trabou y anicia un investigacion despues cu e presunto victima a entrega keho (aangifte). E caso aki no a cay den agrado di Fiscal y ta studiando e posibilidad pa bay den apelacion.
Cu e di dos caso aki ta keda illustra e gran dificultad cu tin pa zedenzaken ja cu ta palabra di e victima contra esun di e sospechoso. Generalmente e casonan aki ta sucede den scondi y sin pruebanan mas condundente ta pone cu autoridad no tin hopi caminda pa cana.
