E Banco Central di Corsou y Sint Maarten a confirma cu e ta trahando riba scenario futuro strategico pa ENNIA Aruba conhuntamente cu Banco Central di Aruba.
Di e manera aki e regulador ta contestando na rapportnan reciente y speculacion andando tocante e seguro segun medionan local.
CBCS a comenta cu tin varios opcion strategico pa ENNIA Aruba cu actualmente ta bao exploracion. Segun e banco central, e proceso aki ta canando di manera constructivo y ta tumando luga den consulta cercano entre ambos regulador.
Pa motibo cu e proceso aki ta uno cu mester cana den confidencialidad, e banco no ta dunando ningun detaye tocante e dialogo ni tampoco e posibilidadnan cu ta bao consideracion. Sinembargo, CBCS a declara si cu varios noticia circulando den media ta contene varios eror y ta pintando un imagen cu no ta berdadero ni ta representa e realidad di e situacion actual tocante ENNIA Aruba.
Na mesun tempo, e regulador ta purbando di alivia preocupacionnan di clientenan y esnan cu tin polisa. Segun CBCS, ENNIA Aruba su operacionnan diario ta sigui cana cu normalidad y e seguro ta financieramente den bon posicion y cuerdo. E compania ta opera di manera independiente y ta bao supervision di e Banco Central di Aruba.
CBCS tambe a señala cu e actividadnan di e seguro ta cay bao di VEHIA NV via Ennia Caribe Holding Aruba, di acuerdo cu e asina yama Framework Agreement of April 2024.
Segun e banco central, e interes di ambos ENNIA Aruba y e compania mas amplio ENNIA group y tur esnan cu tin polisa ta tuma na cuenta ora di evalua e varios opcion cu tin.
