(FoxNews) – Centro pa Control y Prevencion di Malesa (CDC) a anuncia diabierna cu ta investigando reportahenan di “un malesa nobo estilo botulismo den varios estado resultado di inyeccion di toxina botulinum (comunmente yama Botox) administra den entornonan no-medico,” e agencia a bisa den un declaracion.
“Nos ta coordinando un investigacion di brote multi-estado,” e agencia a agrega,
Malesa a keda reporta na departamentonan di Salud di Tennessee y Illinois, cual ta trahando cu CDC y FDA riba e investigacion, CDC a nota.
Na Tennessee, cuatro pashent a busca cuido medico despues di experimenta “señal y sintoma estilo botulismo” despues di ricibi inyeccion di Botox pa proposito cosmetico, segun un declaracion online di Departamento di Salud di Tennessee. A hospitalisa dos di e pashentnan.
“Investigacionnan conhunto a identifica preocupacion tocante uso di productonan falso of producto di origen incierto administra den entornonan no-medico manera cas of spa cosmetico,” e declaracion a bisa.
Departamento di Salubridad Publico di Illinois a duna un declaracion similar despues cu dos pashent a reporta cu a ricibi inyeccion di Botox posiblemente di contrabanda na Condado LaSalle.
E dos individuo a reporta sintomanan cu a inclui problema di vision, cara cu a cay, fatiga, dificultad pa hala rosea y un stem seco, segun e declaracion.
E pashentnan, ambos cu mester a keda hospitalisa, a ricibi e inyeccion di un enfermera licencia kende tabata “eherciendo trabao fuera di su autoridad.”
Casonan adicional a keda reporta na Kentucky, Washington y Colorado.
“E fuentenan di e productonan di toxina botulinum no ta conoci of no ta verifica na e momento aki,” CDC a declara. “Pregunta tocante regulacion di producto y investigacion di producto mester keda dirigi na FDA.”
