Como un di cada tres Arubiano of residente di Aruba no tin entrada y no tin cuminda. Si no tabata pa e accion di donacion di cuminda cu Hulanda ta financia pa medio di Cede Aruba y donacionnan local na instancianan manera Fundacion Pa Nos Comunidad, Aruba lo a conoce casonan cu solamente tabata mira na Africa. Famianan sin nada pa come. Como 12 mil famia ta dependiendo di paketenan di cuminda desde April y pa awor, lo no mira cambio.

Pa tal motibo mes, CEDE Aruba a amplia su iniciativa digital, e plataforma Happy to Give Back, HTGB ta un plataforma pa por haci donacion di cuminda.

CEDE Aruba a manda un asina yama ‘follow-up’ e-mail, unda ta ilustra kico tur a haci y cu ta bolbe pidi pa sigui sostene e accion y comparti e e-mail cu otro rednan na Hulanda y Europa.

A informa den e e-mail cu a lanta HTGB asina cu Aruba a keda asota pa COVID 19, cu a laga hopi hende sin trabou. Mesora a bira cla cu ayudo di cuminda ta esencial. No menos cu 12 mil famia ta dependiente di ayudo di cuminda, cu ta un tercera parti di e populacion di Aruba. Como 7500 famia ta haya ayudo for di Ministerio pa Asuntonan Interior di Hulanda pa medio di Cruz Cora. Fundacion Pa Nos Comunidad , FPNC, e banco di cuminda nacional ta yuda como 3000 famia danki na sosten financiero di Gobierno di Aruba y donacionnan local y tambe HGTB. Pero e ta nifica cu tin como 1500 famia cu no por haya cuminda structuralmente. Un pakete di cuminda ta costa como 160 Euro of 335 florin. Pues pa e 1500 famianan aki mester mensualmente un suma di 240 mil euro adicional pa luna pa asina percura cu tur hende ta haya algo di come.

HTGB ta sostene tres iniciativa local riba e isla cu ta FPNC, YMCA cu tin su programa di cuminda cayente pa hendenan grandi y Ban Uni Man pa Cria nos Muchanan, cu ta un programa di desayuno pa muchanan cu ta bay scol. E totalidad di e donacion di HTGB ta bay pa e fundacionnan aki.

Kico Happy to Give Back a haci te cu awor

HTGB a lanta diferente campaña digital como fisico den e ultimo 6 lunanan pa recauda mas tanto fondo cu ta posibel. Asina a cuminza cu un campaña riba red social unda diferente amigo di Aruba, incluso e famoso yiu di tera y baseballista Xander Bogaerts, campeon mundial di windsurfing Sarah Quita Offringa y ingeniero di NASA Dr. Edward Cheung a haci yamada pa sostene HGTB.

Banda di esey a organisa e luna di HTGB, unda a organisa diferente actividad pa recauda fondo, cu a culmina na un radio y telefon nacional. Un total di 12 stacion di radio y TeleAruba a transmiti conhunto programacion cu tabata den luz di HTGB pa 48 ora largo. Un cantidad di organisacionnan local y internacional a contribui den unicamente 48 ora a logra acumula como mey miyon florin.

CEDE Aruba ta puntra Hulandesnan cu si nan lo bin Aruba den e periodo venidero, pa nan pone atencion na e caha di donacion di Happy to Give Back na restaurantnan, stacionnan di gasolin y supermercadonan. Aki por haci donacion di placa cash of via un QR code riba e caha, haci un donacion online via telefon.

Impacto HGTB

Cu e placa cu HTGB a recauda te cu awor por a brinda ayudo na: 2.190 famia cu un pakete di cuminda pa luna; a percura pa 19.569 desayuno pa muchanan na scol; 24.458 cuminda cayente pa esnan mas vulnerabel y hendenan grandi.

Den e luna venidero CEDE Aruba lo inicia un campaña na Hulanda pa hala atencion pa HTGB, dirigi na Arubianonan cu ta biba na Hulanda y tambe esnan na Hulanda cu ta carga Aruba den nan curazon. “Nos ta hopi gradicido na Arubahuis, ATA Hulanda, District 297 y e asociacion di studiante Kompas cu ta yuda CEDE Aruba pa yega na mas tanto hende posibel na Hulanda. Arubahuis tambe ta brinda e oportunidad aki.

Con por sostene

Tin diferente forma con por sostene HTGB pa medio di donacion online, unda por scoge pa haci esaki tanto mensualmente of pa un biaha. Lo por haci e donacion pa medio di www.happytogiveback.com of via e plataforma Whydonate unda por haci uzo di Ideal y Paypal. Si click riba e link https://www.whydonate.nl/fundraising/happy-to-give-back-aruba, e ta hiba e usuario mesora pa e website di Whydonate.

Ta pidi si tur por comparti e informacion cu nan propio rednan, y cu esnan cu nan ta kere cu por tin un aprecio pa Aruba. Tambe ta stimula iniciativanan denter organisacion, red, famia of amigo pa recauda fondo pa HTGB. CEDE Aruba ta dispuesto pa brinda sosten. “Por ehempel un grupo di hoben profesional na Hulanda ta pensando riba un ‘challenge’, (un reto) y e asociacion Kompas a dicidi pa publica un buki di cushina Arubiano pa bende esaki. E fondonan recauda lo bay pa HTGB.

15 mil

Daniel Tecklenborg di CEDE Aruba a bisa Bon Dia Aruba cu aunke ta papia di 12 mil famia cu ta depende di donacion di cuminda pa nan sobrevivencia, realidad ta cu e por ta hasta mas. Pero te ainda no a logra combina e banconan di data di tur e organisacionnan pa sigura cu no tin hende cu ta inscribi na mas caminda. E ta rekeri un colaboracion entre e organisacionnan. Pues, si tin duda cu un famia kizas ta riba dos lista, no ta inclui esaki den e totalidad.

Riba e pregunta si Aruba mes ta haci donacion continuo, e pregunta ta cu awor a ripara un aumento. Den ultimo 6 simannan e donacionnan di comunidad a baha un poco pero ta kere si cu e lo aumenta pa e dianan di fiesta, ora cu ta tradicion pa duna mas pa comunidad.

Di otro banda, CEDE Aruba ta poco preocupa pa comienso di 2021, pasobra no sa con lo bay sigui y si tin opcion. “Tur cos ta depende con turismo lo desaroya.”

E donacionnan internacional tambe a bay bon relativamente, pero awor tambe nan a baha. Pa e motibo aki mes a dicidi pa bolbe enfoca riba Hulanda. Lo sigui purba stimula donacion di Merca pa Aruba, pero esaki lo mester bay den synergia cu ATA, pasobra no kier stroba e mercadeo di Aruba tampoco.

Donacion na organisacionnan

Locual CEDE Aruba ta spera di logra ta pa haya un sistema structural pa por haya donacion pa gruponan vulnerabel, y no solamente esnan cu tin hamber. Tin hopi organisacion cu ta yuda personanan cu limitacion no a ricibi sosten e aña aki y nan tin mester di placa. Como tal, CEDE Aruba ta spera cu mas supermercado, manera Superfood a haci spontaneamente ta bin cu programanan pa sostene e trabou social na Aruba. “CEDE Aruba tabata trahando riba un proyecto cu hotelnan, pero esaki mester a para ora cu Covid a dal. Pero awor nos ta trahando riba un plan strategico nobo pa yega na recaudacion di fondo pa medio di companianan rond Aruba.”

Tur compania cu ta interesa pa haci coleccion na interes di comunidad por tuma contacto cu CEDE Aruba. Riba e website http://cedearuba.org/ tin e diferente formanan pa haci donacion.