Minister Xiomara Maduro a referi na e celebracion venidero di dia 18 di Maart. E biaha aki minister Maduro bistiendo su pechi como mandatario encarga cu cultura a duna un breve contexto historico riba e fecha aki.

E mandatario a bisa cu na ocasion aki nos ta recorda cu 45 aña pasa riba un anochi di 18 di maart di 1976 na Wilhelmina Stadion, awe conoci como Compleho Deportivo Guillermo Prospero Trinidad, a wordo proclama oficialmente nos Himno y Bandera.

Minister Maduro a informa cu e celebracion aki lo tuma luga totalmente di un forma virtual –mescos cu celebracion reciente di Dia di Betico y otro celebracion mas – debi na e situacion di e pandemia. Considerando cu 18 di Maart ta un fecha historico pa nos pueblo, gobierno a dicidi di bay virtual, via e canal di television y medio social.

Te ainda no tin pensa di probecha nos fecha nacional di Himno y Bandera pa recauda fondo via CEDE Aruba pa yuda e famianan den mas necesidad debi na e crisis Covid, manera Arubahuis si tin pensa di haci durante celebracion di Aruba Dag. El a bisa cu nan no a pensa di bin cu un recaudacion di fondo na Aruba. Pero e lo evalua e posibilidad aki hunto cu e comision di Celebracion di Dianan Nacional.

Calendario di actividad

E aña aki, manera ultimo añanan, gobierno lo percura pa material educativo y informativo por yega den man di nos hobennan pa asina nan por sigui hiba e mensahe aki pa nos futuro generacion.

Nan lo ricibi un buki ilustrativo bao e titulo: “Mucha Crioyo Mi Ta.” Un buki cu ta conta historia di nos himno y bandera. Tambe lo prepara un video riba historia di nos simbolonan nacional cu tur scol lo por uza como material educativo. Pero e lo ta accesibel pa pueblo en general tambe via Facebook y YouTube.

 

E comision encarga cu celebracion di dianan nacional a traha un calendario di actividad den conexion cu nos Dia Nacional di 18 di Maart. E ta inclui dia 6 y 7 di maart e custumbrando “Un Canto na Nos Himno y Bandera.” E ta un festival caminda nan participantenan ta bin cu composicionnan di cancionnan dedica na Aruba.

E otro actividad ta “Poeta di Patria” cu lo tuma luga dia 9 di maart. E proyecto aki ta duna oportunidad pa tur ciudadano di pais Aruba por competi cu nan poema, y tambe nan por declama. E lo tin como escenario Cas di Cultura, caminda e lo wordo graba y retransmiti pa e canalnan di television y demas medionan.

E manifestacion cultural di 17 di maart -segun e mandatario- e ta wordo organisa den cuadro di e 45 aña di introduccion di nos Himno y Bandera. Tambe e ta un actividad virtual y transmiti den bibo via canal di television y otro medionan di comunicacion, caminda minister Maduro lo duna un discurso como minister di cultura. Tambe nan lo bin cu un programa di musica, canto, baile y tambe poesia cu participacion di e artistanan local.

Pa clausura e agenda di actividad den cuadro di Dia di Himno y Bandera lo tuma luga e acto protocolar riba dia 18 di maart. Nan lo adapta e acto protocolar manera cu nan a haci’e cu Dia di Betico, caminda nan lo tin diferente discurso. E aña aki debi na e situacion di Covid-19 no lo tin e desfile di gruponan uniforma. Tambe e ceremonia aki lo wordo transmiti den bibo via television local y mas medio di comunicacion.

Minister di Cultura a haci un invitacion pa henter nos pueblo riba fecha di 18 di Maart pa nos para keto pasobra nan ta “nos simbolonan cu ta identifica nos como un pais chikito den un mundo grandi.”