Comandante di Brandweer Aruba, Edward de Cuba a declara na Bon Dia Aruba cu durante e fiesta tradicional di San Juan/Dera Gay a tuma algun incidente cu candela cu nan cuerpo mester duna asistencia.

Esaki a pesar cu nos ta pasando keto bay den e crisis Covid. Pero esaki no a haci niun excepcion pa hendenan probecha pa kima sushi den nan cura di cas.

Segun De Cuba e kimamento cu ta tuma luga cu e fiesta aki no a mengua full. Tabatin hende cu a haci uzo di e oportunidad aki pa haci nan tereno limpi y kima e sushi eynan.

Na momento cu De Cuba a bin cu su declaracion, e no tabatin e cifra disponibel di e asistencianan cu brandweer a duna dia 24 di juni ultimo. Pero si el a bisa cu tabatin un par di candela basta grandi. Pero no compara cu añanan anterior cu si tabata mas druk te oranan di madruga. Mientras cu e aña aki, ya prome cu 11’or anochi, tur cos a mengua basta hopi, y despues tur cos a bay mas trankil.

Locual e por bisa e biaha aki ta cu e celebracion publico den diferente luga no a tuma luga dor di e Covid. Esaki a haci cu tabatin hende cu a dicidi di celebr’e cerca nan famia den nan cas pa sigui cu e tradicion di e fiesta aki. Pero si e ta reconoce cu e aña aki fiesta di San Juan y Dera Gay a bay mas trankilo.

 

LEAVE A REPLY

Please enter your comment!
Please enter your name here