Celebridadnan di TikTok, Bryce Hall y Blake Gray ta enfrentando cargonan criminal despues cu nan a tene fiestanan recientemente na Hollywood Hills a pesar di e prohibicion na e ciudad pa reunionnan grandi durante pandemia di coronavirus, autoridadnan a bisa diabierna.

Oficina di fiscal di ciudad di Los Angeles a entrega cargonan pa delito diahuebs contra Hall y Gray. E celebridadnan di internet cu miyones di siguido riba TikTok ta comparti un cas y ta acusa di a tene dos fiesta menos di un siman apart.

No a keda inmediatamente cla si Hall y Gray tin abogado cu por papia den nan nomber, y esfuersonan pa tuma contacto cu nan representantenan no tabata exitoso.

Fiscal di e ciudad, Mike Feuer a bisa cu e no ta na altura di ningun caso di Covid-19 te awo vincula na e fiestanan na ca dia 8 y 14 di augustus ultimo, pero e periodo di dos siman den cual por presenta sintoma no a pasa ainda. Polis di Los Angeles a responde na ambos fiesta, cu tabata conta cu varios centenares di invitado, y a duna citacion.

“Si bo tin 19 miyon siguido combina riba TikTok memey di un crisis di salubridad publico, bo mester ta modelando tremendo comportamento, miho practicanan, pa nos tur, na luga di viola ley y post video di esaki”, Feuer a bisa durante un conferencia di prensa ayera.

Hall y Gray ta acusa di viola e orden di salud di e ciudad pa e pandemia, y e ordenansa di fiesta na cas. Castigo ta inclui un aña den prison y multa di hasta $2mil. E fiesta dia 14 di augustus tabata supuestamente pa celebra e 21 cumpleaño di Hall.

Alcalde Eric Garcetti siman pasa a autorisa e ciudad pa corta awa y coriente na e cas. “A pesar di varios advertencia, e cas aki a converti den un club nocturno na e ceronan”, Garcetti a bisa.

Cu bar cera na e ciudad, fiestanan grandi na cas por converti den ‘super-transmisornan’ di Covid-19, segun Garcetti.

Accion di Garcetti a bin despues di un fiesta dia 3 di augustus na un otro cas den e ciudad, unda centenares di hende a reuni sin tapaboca ni distanciamento social. E fiesta a termina den un tiramento cu a cobra bida di un muhe y herida otro dos persona.

Condado di Los Angeles a registra casi 237mil caso di Covid-19 y mas di 5,700 morto, haciendo esaki e condado mas afecta na e estado. “No ta djis e cas di e fiesta cu ta afecta” Feuer a bisa. “E individuonan cu atende bo fiestanan por bay y plama (e virus) na nan ruman, mayor, welo, compañero di trabou of otronan den publico.”