Ta trata di e yiu menor di Norma Rivas Arrindel, cu a fayece dia 19 di augustus ultimo. Durante un entrevista pa medionan local, el a trece dilanti su preocupacion pa loke ta trata e caso di su mama, na unda el a sigura: “Algun dokter Hulandes no a duna su maximo esfuerso pa salba e bida di mi mama na e momento debi.”
Rivas a expresa cu profundo sentimento cu el a priminti su mama cu e lo lucha y bay bringa te na final pa negligencia medico di parti di algun dokternan Hulandes por stop por completo.
Den caso di su mama, el a specifica cu no ta trata di cuido medico di hospital cu no a bay bon, al contrario. “Nan ta atende sublimemente cu profesionalismo y determinacion” y nan a atende su mama corectamente y debidamente.
Asina mes, el a señala cu “semper tin un hende pa daña e bon ambiente.” El a trece dilanti un entrevista cu el a duna pa otro medio di comunicacion, den cual algun hende a compronde e informacion robes di loke ta trata e cuido medico Arubano, pero esey no ta corecto.
Cu esaki, el a bisa cu no ta pa trece sensacionalismo manera pueblo di Aruba ta custumbra, ni pa culpa of lastra ningun hende. Tampoco cu e ta contra di gobernantenan cu ta regarda bou cuido medico. Ee simpel hecho ta cu den su opinion, “e negligencia medico pa loke tin di haci cu hendenan di edad grandi mester yega na un stop absoluto” Rivas a declara.
Rivas a conta con e ultimo dianan di bida di su mama tabata ta – ken cariñosamente famia y amigonan tabata yama ‘Ba-Ba’– y na unda el a presenta cierto problemanan di salud cu su dokter di cas a bay atende na cas mes.
Despues cu a haci un prueba di sanger, Rivas a comenta cu e dokter a afirma cu den e prueba no a sali nada malo den sanger di su mama, cu tabatin 81 aña di edad. Cu su pancreas, higra y riñonnan tabata funcionando bon, algo cu el a haya como un bon noticia.
Dia 12 di augustus, dia cu Rivas a enfatisa cu lo recorda pa e resto si su bida, e situacion di salud di su mama a empeora, caminda cu el a sigura cu su mama no por a hala rosea, ni por a guli awa. Ora dokter a yega na cas pa wak’e y conecta algun ekiponan di chekeo – cu el a pensa cu por hacie pa check si cu tur cos tabata bon, pero e no a hacie – e dokter a vocifera ‘ah pero, e ta muriendo’, un frase cu ora Rivas a scuch’e a bisa: ‘algo no ta klop’.
Despues, si a haya sa cu su mama tabatin un infeccion di pulmon cu segun dokternan ta yama ‘Pleural Effusion’ y su situacion a empeora. Pero den e rapport cu el a haya tabatin algun informacion bruha, segun el a afirma. Loke si ta sigur ta cu “mi mama no a fayece di ningun Covid-19 manera hopi hende kier causa sensacionalismo” y el a mustra e resultado negativo di e prueba.
Despues cu su antiguo declaracion a causa polemica, Rivas a menciona cu el a haya hopi dolor pa motibo cu e tabata pensa cu e tabata haci lo corecto. “Mi no a haci’e pa complace ningun hende, ma hacie pasobra e berdad mester wordo bisa”, el a expresa.
Mescos cu tin algun activistanan cu tin cierto puntonan cu mester aclaria, Rivas ta trece su punto e cual ta trata di conscientisa pueblo tocante cuido medico pa hende grandi.
Den dianan cu a pasa, Rivas a señala cu segun estadisticonan y analisis di e dokternan, el a haya sa cu su mama lo no por sobrevivi ni un operacion, ni un tratamento –aunke el a hay’e y a mehora su condicion un par di dia – na final, e dokter a afirma cu no por haci nada mas pa su mama y cu e tabata duna dos of cuatro dia di bida.
Cu esaki, Rivas tambe a informa cu su mama no a mester ta den hospital, pa via cu dokter a bis’e cu na e momentonan aki di aumento di casonan di Covid-19 no tabata mucho bon pa por permanece eynan. E dokter a dicidi di manda su mama na cas. Diasabra 19 di augustus pa 10or y 35 minuut di anochi segun su oloshi, su mama Ba-Ba a fayece. El a menciona cu “tabata un escenario cu nunca mas mi lo lubida, mi dilanti el a fayece”.
Loke a pensa tabata cu si dokternan por a implementa algun ekipo y e tratamento, cu el a hay’e su mama por a continua cu bida, algo cu e no ta sigur si of no. “Kisas si e dokter a dun’e e tratamento su situacion lo a mehora of por tabata un tiki mas stabiel”, Rivas a declara.
Pa finalisa, el a pidi pa Dios bida y salud cu si algun persona mester bay hospital nan lo atende hopi bon. Pero “wowo cu algun dokternan Hulandes”, pa motibo cu nan no a atende su mama manera a mester ta. Asina kier preveni y conscientisa hende pa evita cu loke a pasa cu su mama lo no pasa nunca mas cu otro hende, cu hendenan di edad grandi no lo sufri di negligencia medico.
